Online Reporter
Siphathokuhle Ngulube
LITSHONA njani bafundi. Ngithemba liqhuba kuhle ezifundweni zenu kanti njalo ngithemba izichwayisiso ziyaqhubeka. Ngilethemba lokuthi selizwisisa njalo indlela seliyibona ngcono, akusekho ukuthandabuza ngelikwenzayo kuzichwayisiso zenu. Ngeviki ephelileyo sixoxe kabanzi ngesigaba sesibili sesichwayisiso.
Sikhangele okumqoka ngalesi isigaba saze satsho ukuba lesi isigaba yiso esikhangela kabanzi ukuthi abanye abalobi bathini kumbe abanye abantu abaseduze kwakho labangekho eduze kwakho bathini ngesichwayisiso sakho. Lapha-ke sikutshilo ukuthi kudinga ukuba abafundi badinge sibili ulwazi olubalulekileyo njalo oluthe xaxa ukuze izichwayisiso zabo zibe lesisindo. Lokhu ngesilungu kuthiwa yi(literature review). Lesi sigaba-ke asilidingi ivila, sidinga umuntu okhutheleyo ozangena lapha lalapha edinga ulwazi ngesihloko sakhe.
Kusonalesi isigaba njalo kuyadingeka ukuba umfundi akhangele ukuthi kanti abanye bavele sebenze yiphi imizamo ukuthola isixazululo sohlupho lwakho. Sikhumbule phela ukuthi ezinye zalezi izinhlupho bakhona abangabe sebeke bachwayisisa ngazo kanti lawe ukhethe ukuchwayisisa ngalo okutsho ukuthi bakhona abangabe sebeke bazama ukuthola isixazululo ngalolo hlupho.
Ngalokho-ke kuhle udingisise ngaleyo mizamo esiyenziwe ngabanye uyibeke kusigaba sesibili ngaphansi kolwazi olutshiyeneyo ozabe usulutholile. Ake sithi uhlupho lwakho ngolokuthi abantu besigabeni ohlala kiso abaselalo ulwazi ngemithi yesintu osekudale ukuthi itshabalale ngoba phela sebeqakathekisa imithi yesilungu labodokotela besilungu. Minengi-ke imizamo esike yazanywa ukuvuselela lolulwazi lwemithi yesintu. Ungakhangela ukuthi sekulezinhlanganiso ezithile ezigqugquzela ukuthi abantu babuyelele imithi kanye lezinyanga zesintu.
Zikhona izinhlanganiso ezinjengaboZINATHA. Le yinhlanganiso eqakathekisa imithi kanye lezinyanga zesintu.
Inhlanganiso le yenza imizamo yokukhuthaza abantu ngokuqakatheka kwemithi yesintu kanye lezinyanga nje zesintwini. Okunye njalo kulezi izinsuku uthi uzihambela nje ikakhulu emadolobheni uhlangane labantu abathile loba amaphetshana akhuthaza ukuthi uvakatshele endaweni ethile uthole umuthi wesintu ongakusiza kumkhuhlane othile.
Okunye njalo nje ungananzelela kulezi insuku sekulezinhlanganiso ezinengi ezikhuthaza ukuthi abantu basebenzise izinto zemvelo kumbe ngithi imithi yemvelo ukwelapha izifo ezithile (herbalists) Ngezinye-ke zezinto ongazilandisa lapho usukhangela imizamo nje esike yenziwa ngabanye phambilini ukuxazulula uhlupho lwakho. Kuqakathekile-ke ukuba sisabalalise imiqondo yethu njalo sihluze imibono ethile ukuze sithole lezi zixazululo. Asizameni-ke ukubhala isigaba sesibili sezichwayisiso zethu ngokugcweleyo. Asihlanganeni kuviki elizayo siqhubeka ngezichwayisiso zethu.
