Online Reporter
UTHANDO lungumanqoba ngoba lapho okulothando khona ubona abantu bebobotheka konke nje kuhamba ngendlela ekhangelelweyo.
Abantu bakudala babelwazi uthando njalo imizi yabo yayihlala iqinile. Umuntu wayekhetha ukuthi ahlale lomuntu ongelanotho, ongela ngitsho lenkomo ngoba emnika uthando olujulileyo njalo oluvutha bhe!
Lamuhla akusekho konke lokhu, abantu sebegijimisa imali kuphela lobunandi bedolobho bekhohlwa ukuthi kumele banike omkabo uthando oluyintokozo lenjabulo enkulu.
Yebo impilo esiyiphila kulezinsuku ngeyemali kodwa-ke ungakhohlwa ukuthi uthando ngeke uluthenge, lapho ofisa ukuthandwa khona thanda lawe ngendlela efanayo. Uthola indoda ingena emsebenzini ekuseni itshayise ebusuku.
Ekutshayiseni idlule ebhawa ingene ebusuku umama eselele, ivuke futhi ekuseni ngovivi isiya emsebenzini ize ngobusuku futhi.
Umdeni ucina ungasakwazi ukuthi kulobaba ekhaya. Yikho-ke lapho okucina kungena amagenga ekhaya amadlecatsha.
Lokhu kayisikho ukuziphatha okukhangelelweyo kwabathatheneyo yikho amakhiwa afaka isikhathi somsebenzi saba kusukela ngo-8 ekuseni kusiya ku 5 ntambama. Besenzela ukuthi kuthi kusiyadliwa ukudla kwakusihlwa imuli ibe isihlangene, yazane itshengisane lothando oluyilo okumele lube yisisekelo semizi yonke.
Abantu besifazane banjengabantwana, umfazi uyabe edinga isikhathi sokuba lomkakhe. Owesifazane ungamupha leso sikhathi uyabe umjabulise kakhulu, uzambona esiba yindlovukazi okutshengisa ukuthi uphethwe kuhle.
Akhona amanye amadoda achitha isikhathi sawo labomakhwapheni efulathela imizi yawo. Labo abenza lokhu bakhumbula emuva nxa izikhwama sezibetha umoya kodwa ngesikhathi beselemali bayabe bezitshaya izifuba bengazi ukuthi kayisikho kutshengisa omunye wakho uthando lokhu.
Nxa umuntu wakho umthanda uzambona laye ekuthanda. Ungaze utshone emsebenzini bona ukuthi uyamtshayela ucingo umbuze ukuthi utshone njani umtshele njalo ukuthi uyamthanda.
Uthando vele lona lungumanqoba njalo kakho ngitsho loyedwa owala ukuthandwa ngoba lokhu kuyindalo yethu njengabantu. Kuyadingeka ukuthi ezimulini abantu bathandane ngazo zonke izikhathi ukuze imizi ingachitheki njengalokhu esesikubona kunsuku zalamuhla lapho imizi esichitheka ebusuku lemini kungabi ndaba zalutho ngitsho.
Nxa kungaba lothando emulini ngeke njalo kube lokusebenziselana imithi yokuba lo ongathandi omunye amthande ngenkani.
Kungumbono waleliphephandaba ukuba aluba wonke umuntu engazipha umlandu wokuthanda lo amkhethayo njalo angaze akhohliswa ngamaluba omhlaba ngoba aphanga abune njengobukhosi obufana lamazolo.
