Online Reporter
Zimpapers Sports Hub
LOBA wazalelwa eNewport, eWales eUnited Kingdom, uMenzi Mazwi wakubona kufanele ukuthi adlalele ilizwe adabuka kulo, elabokhokho bakhe, iZimbabwe.
Umdlali kanobhutshuzwayo lo oleminyaka engu-19 yokuzalwa, ukuqula lamaWarriors elidlala kunkezo yeCosafa, encintiselwa eBloemfontein eSouth Africa.
Wayelethuba lokuthi adlalele iWales kodwa wala, wakhetha ukuthi agqoke isikipa samaWarriors. Kulandela inyathelo lakhe, inengi lezizalwane zakuleli zimtshayele isandla uMenzi, zibonga ukuthi kazange afulathele abakibo nanko usesebenzisa ithalenta lakhe ukumela ilizwe kumabanga aphezulu.
Lomqeqetshi wamaWarriors uMichael Nees uzizwa elomthwalo wokwamukela abadlali abalomqondo ofana lokaMenzi, ebika ukuba kuphakathi kwenhlelo zabo zokuvuselela amaqembu elizwe.
UMenzi, odlalela endaweni esesiswini senkundla, uqhubeke edlala kakuhle kusukela kumaqembu abasakhulayo e-United Kingdom. Okwakhathesi udlalela kuligi One, eNgilandi.
Abacubunguli bomdlalo bathe indlela adlala ngayo itshengisela ukuzethemba lokungabi lovalo, ukukhalipha, okuyisimilo esifunakala kumaWarriors, ngokutsho kukaNees. Umqeqetshi uthe umdlali lo uzabaluleka kumincintiswano yamazwe kwelizayo, njengoba amaWarriors ezalungiselela umqhudelwano weAfcon.
Ukuba khona kwalumdlali kumaWarriors kubonakala kuyikugcwalisiswa kohlelo lweZimbabwe Football Association (Zifa) lokuxhumanisa lokufinyelela abadlali abakuleli abakhulela kwamanye amazwe aphetsheya. Uhlelo lolu lubizwa ngokuthi: “Roots and Dreams: A conversation with Zifa.”
Uhlelo lolu lukhokhelwa ngumongameli weZifa uNqobile Magwizi lomqeqetshi uNees. Phambilini, uNees loMagwizi bavakatshele eLondon laseBirmingham ngoMabasa. Bafika baxoxisana labadlali, abazali labaphathi babo, kudingwa abadlali abazalwa ngo-2011.
“Ukuba kukaMazwi kuyisibonelo sokuthi inguqu yeZimbabwe ilekusasa elihle njalo ilizwe lilabadlali abalethalenta elimangalisayo eligcwele umhlaba wonke.
“Ukuzimisela kwakhe kuqembu lamaWarriors kubonakalisa njalo ubukhulu lokuqakatheka kokubizwa ngokuthi ungoweZimbabwe. Lokhu kungumzekeliso kwabanye abadlali ukuthi balandele amanyathelo anje, badlalele ilizwe,” kutsho uNees.
