Online Reporter
YiNtatheli kaMthunywa
SEKUBIZWE intengo emangalisayo ebekwe ekhanda lomdlali osakhulayo oweHighlanders uPrince Ndlovu, okubikwa ufunwa ngelibomvu liqembu le-Orlando Pirates.
Njengokubika kwephephandaba leSoccer Laduma, i-Orlando Pirates isitshengise uthando lwayo kuNdlovu, owake walolonga laleliqembu.
UNdlovu uleminyaka engu-19 yokuzalwa.
Kulesikhulu seHighlanders, esiseduzane lokwenzakalayo ekuthengisweni kwabadlali obike ukuba iqembu lifuna ukuthengisa uNdlovu nge-R15miliyoni.
Umdlali ukhonzwa linengi labalandeli beHighlanders abambiza ngelithi: “Peter Ndlovu” ngoba besithi udlala njengalo owake wadla ubhedu.
“IHighlanders FC imphethe njengomdlali obaluleke kakhulu uPrince (Ndlovu) yingakho ibiza i-R15million.
Okwakhathesi intengo le kukholakala ukuthi ibhekiswe eqenjini laseNingizimu Afrika i-Orlando Pirates ngoba kuyabonakala ukuthi yilo elibuze ngomsebenzi wakhe. IHighlanders ikholwa ukuthi yintengo efaneleyo nxa ikhangela ithalenta lakhe, izinga lakhe kunye lekusasa lakhe eliphambi kwakhe,” kutsho lumfakazi ophakathi etshela iSiya Crew.
Kubikwa uPrince ufunwa ngamaqembu amanengi kuzwekazi leSouthern Africa lamanye amaqembu ase-Europe.
“Ngaphandle kwe-Orlando Pirates kuleqembu lase-Europe osekulesikhathi limqaphe ngelokhozi. Ngele-Sturm Graz ele-Austria Bundesliga. Ngakho-ke lintengo ye-R15million ingase ithonywe yikuthi kulentshisekelo evela e-Europe,” kutsho umfakazi wesibili.
UPrince okwakhathesi ukhethwe kuqembu elidlala kunkezo yeCosafa, eBloemfontein, South Africa.
Imali efunwa ngokuthengisa umdlali lo ibonakala ingephezulu kwabadlali abanengi kuHighlanders, kuminyaka edluleyo.
UNdlovu waqeqetsha lePirates ngoMbimbitho ka2023, ngaleso sikhathi wayeleminyaka engu-16 yokuzalwa.
Wayelungiselela ukuya e-Europe, kodwa akusaphumanga lutho. Kusukela lapho, abahloli bePirates balokhe bemqaphile. Kubikwa bazimisele ngokumnika ithuba eqenjini. Bahlezi bemkhangele njalo bayajabula ngokuthuthuka kwakhe kuHighlanders.
Ubulembu
