marble nkomo
Ilanga langoMgqibelo lilanga elibaluleke kakhulu kuzizalwane zakuleli. Lilanga lokuthakazelela uZibuse lapho sikhumbula njalo amaqhawe afela ukuthi ilizwe likhululwe embusweni wabeLungu owawulokucindezela okukhulu kwabansundu.
Kuqakathekile ukuthi abantu bazi ukuthi ukuthakazelela uzibuse ayisikho kwelanga linye kodwa kumele sihlale sikukhumbula njalo sikubongela. Angikholwa ukuthi ukhona umuntu ongafuna ukuthi ilizwe libuyiselwe ezandleni zabacindezeli, abeLungu ababephatha abansundu sangcekeza nje engatsho lutho.
Inkululeko esayithola ngelanga sithola uzibuse kumele siyilwele nsukuzonke ngoba sifuna ukuthi ibe ngokunaphakade. Ngenxa yokuzinikela lokuzimisela kwamaqhawe ethu sesisenelisa ukwenza yiloba yini esiyifunayo.
UHulumende usesibumbele inhlelo ezitshiyeneyo ezifana lokunika abantu abansundu amandla okuvula amabhizimusi abo ngaphansi kwenhlelo ezehlukeneyo.
Izizalwane zakuleli sezisenelisa ukuphatheka ekwembeni amatshe aligugu abalisela igolide, idayimani, ikhopha, amalahle, lamanye amatshe aligugu atshiyeneyo.
Kulabo abalobuciko bokulima, baphiwa amapulazi ukuze balime kuwo, wona lawo ayethethwe ngabeLungu.
Umkhathi wakithi uhambelana lezilimo ezitshiyeneyo ezilinywa emazweni atshiyeneyo.
Loba okunye singeke sikuqede ukukubalisa okumqoka kwakho konke yikuba siyawabonga amaqhawe amanye akade atshona ngokusilethela uzibuse.
Kuqakathekile ukuthi wonke umuntu abambane kuthakazelelwa ilanga likazibuse. Sibongela konke esesilakho esasingelakho ngesikhathi ilizwe libuswa ngabamhlophe. Sasiyisikhathi esibuhlungu kakhulu leso.
Intsha layo kumele ifindiswe ngokuqakatheka kwelanga leli, phela lamuhla abatsha sebebona angani izinto lezi ngezokweyisa nje azitsho lutho kukanti hatshi bakhululekile nje lamuhla ngenxa yezithukuthuku zamaqhawe elizwe.
Imbuthano eqoqwa kunanzwa lelilanga iqakatheke kakhulu njalo kufanele ibe lomutsho empilweni zethu ngaso sonke isikhathi yikho abantu bekhululwa emisebenzini ukuze bayenanza kunye lokuthakazelela ilanga leli.
Lonyaka ilizwe lithakazelela iminyaka engu-46 lathola uzibuse, indlela ziqonda esabelweni seMatabeleland South, esigabeni seMatobo, eMaphisa Stadium lapho okuzaba lombuthano omkhulu welizwe lonke. Umbuthano lo uzakuba seMaphisa ngenhloso yokuhlonipha uFather Zimbabwe, umuyi uDokotela Joshua Mqabuko Nkomo ngendima ayidlalayo ukuthi ilizwe lithole uzibuse kunye lokuthula.
Kulabo abangasoze benelise ukufinyelela eMaphisa, izabe isabalaliswe emadolobheni wonke okuveza ukubambana okuselizweni leZimbabwe.
Ilanga leli laletha i-democracy esasingayazi. Umuntu onsundu wayengazi ukukhetha inkokheli lamuhla sesikwazi ngenxa yalabo abangena iganga bayakulwa kunye lalabo ababesele emakhaya kodwa bebancedisa ngokudla lokubanika ulwazi ngezitha.
Kungumbono woMthunywa ukuthi izizalwane zakuleli ikakhulu laba abazelwe ilizwe selithole uzibuse bangathatheli phansi ikhefu leli. Asisukumeni ngobunengi bethu sibhekise amabombo eMatabeleland South lapho okuzaqhutshwa khona umkhosi kazibuse welizwe kumbe kwezinye indawo ezibekiweyo.
Abatsha baxekane lomlomo wokuthi uzibuse ngowamakhehla lezalukazi.
Asilithakazeleleni sikhumbula ukuthi ilanga likazibuse liqakatheke ngani.
Online Reporter