Online Reporter
Ukungathembeki kwabantu emzini yabo sekubangele ukubhidlika kwemizi kunye lokuhlupheka kwabantwana abanengi elizweni.
Inengi labantu abatshadileyo njalo asebemise imizi yabo emihle emadolobheni kunye lasemaphandleni basuka bahugwe yizinto ezingelamsebenzi batshiye imuli zabo bethi bayakholisa kanti cha baya ekuhluphekeni.
Ukungathembeki kwendoda lomkayo kuyaphambanisa ukukhula kwabantwana loba bethola konke abakufunayo.
Abanye abazali bayalwa phambi kwengane zabo bathukane ngenkalakatha zenhlamba kungabi ndaba zalutho.
Lokhu kungezwani phakathi kwalaba ababili esikhathini esinengi kuyabe kubangelwa yikungathembani kunye lokungakhulumisani kuhle.
Uthola ubaba kumbe umama esiyathandana lomunye umuntu ethi uyaziphumuza ukuhlulukelwa okusemzini wakhe kanti cha usephambanisa ngamandla.
Akusamangalisi edolobheni lakithi ukuthola umama etshukana ledlalicatsha ayabe elikhande xhaka lilomkakhe.
Uthola abanye abantu bengabazwela umama womuzi kuthi abanye bengabazwela lo omunye oseqilwe yindoda.
Ngenxa yalokhu, inengi lemizi iyachitheka itshiye abantwana beyimhambuma belala ezitaladeni. Abanye bathi loba besele ngekhaya bahlulukelwe ngoba umama lobaba bengasekho ndawonye ukuba bathole uthando oluvela kubazali babo.
Abanye njalo abangenelisiyo ukuphila ngendlela embi bakhetha ukuzibulala benatha imithi kumbe bezibophela.
Konke lokhu kubangela ukukhathazeka kunye lokuhlupheka okukhulu kulaba ababukeleyo ikakhulu abantwana bona abayabe bengonanga lutho.
Abantu abaphila legcikwane lengulamakhwa baya besanda elizweni ngenxa yokwehluleka ukukhulumisana kwabantu ababili nje.
Kukanti bekuyinto enhle ukuthi abantu bakhulumisane nxa kulokungazwisisani okuthize phakathi kwabo.
Akulabunzima obungalungisekiyo nxa abantu bezimisele kodwa okusuka kube nzima kuphela yikuthi umuntu nxa elensolo usuka akhethe ukuzithulela ethi akunani kanti enhliziyweni uyabe evutha.
Kukanti uma angakhulumisana lomunye wakhe, babonisane ngodaba olungabe luyabahlupha kuba kuhle kube njeya.
Inengi labantu abatsha abatshadayo kulezi insuku abasahlali iminyaka engaba litshumi betshadile.
Bayaqala ukulwa, ukuthethisana anduba behlukane.
Yebo, kudala izinto zisahanjiswa kuhle, indoda lomkayo babethi bengaxabana behluleke ukukhulumisana kuhle badinge isihlobo abasethembayo sizobalungisela udaba olubahluphayo kodwa lokhu akusekho khathesi, abantu bangaxabana yilowo lalowo usethwala imitshaqana yakhe azihambele.
Kuyadanisa ukuthi inhlanganiso ezigcina intandane zilokhu zisandelwa ngabantwana hatshi abazintandane kuphela kodwa labalabazali abasuke bababalekela.
Pho ilizwe lethu eleZimbabwe lizabe lisakhangeleka na eminyakeni elitshumi ezayo uma abantu bengaphanganga bazinikela ekulungiseni loluhlupho.
Abadala batsho beqinisile nxa besithi akulamuzi ongathunqi intuthu, kodwa phela nxa uthunqa intuthu akutsho ukuthi abantu abasathandi sebengabhidliza izithukuthuku zabo babulale lempilo yengane zabo.
Nxa abantu bethandana njalo bekhulumisana abangeke badlalelana umacatshelana loba sekutheni.
derick.khumalo