Online Reporter
YiNtatheli kaMthunywa
KUDABA olusabhayisikopo, kulendoda yeHarare – uMcClean Samuriwo (38) – engumculi njalo idabuka eChihota, ethi ayiselakho ukuthula empilweni nanko phela ihlala ilandelwa yizikhova, kungakho idinga uncedo.
USamuriwo uthe akakhethi muntu, wonke ongamncedisa kungaba ngowendabuko kumbe owesonto, ukhululekile ngoba laye ufuna impilo elokuthula.
“Ngikhulele emzini kababamkhulu, ubaba ozala umama, ubaba wami kangizange ngenelise ukumbona. Emzini engikhulele kiwo kwakulendlu eyayilinxuwa, endlini le kwacina sekuqala ukuhlala izikhova njalo nxa ngingaphambanisi ngisenza uGrade 2. Njengomntwana omncane, ngathatha abantwana bezikhova lezi ababephakathi kwenye ibhodo le, ngathatha ibhemba ngabajuqula amakhanda abo bonke beyisithupha,” kutsho uSamuriwo.
Uthi ngemva kwesenzo lesi, akula muntu owakhuluma laye ngaso kumbe ukumbuza ukuthi wayekwenzelani.
“Ngokuya kwensuku, izikhova lezi ngacina sengizibona seziqala ukungilandela ubusuku ngabunye, ngihamba ngizizwa zikhala loba ngubani engihamba laye, laye wayezizwa. Inkinga le yaqhubeka ikhula kwaze kwaba yisifo kimi njalo izikhathi ezinengi ngiphupha ngisemacansini labomama abatshiyeneyo. Kangilamfazi, ngizamile ukwakha umuzi kodwa kuyala ngoba bayangilahlisa omama engithandana labo. Ngike ngazama ukuncediswa, yebo izikhova azisabuyi ngaso sonke isikhathi kodwa zivame ukubuya ngezikhathi ngama-9, 12, lo 3 ebusuku,” utsho njalo.
Indoda le, engumculi, ithe isike yacula ingoma emayelana lokuhlukuluzwa akade ikwenziwa yizikhova lezi.
USamuriwo uthi uke wafika lasemisakazweni wabika ngenkinga yakhe emsakazweni weStar FM kuhlelo lukaTilda Live wathola abantu ababemncedisa kodwa inengi labo liyabe lifuna imali enengi lezifuyo ezinjengezinkomo okuyinto eyenze wehluleka ukuthola uncedo olugcweleyo.
“Ngemva kokubikwa kwenkinga yami emsakazweni, ngahlangana lobandlululo emphakathini lapho abanye abantu abaqala ukwenza ama “emoji” alomfanekiso wami lezikhova bengihleka. Ngathola abalutshwana abangincedisayo kodwa inkinga kayikapheli ngoba izikhova zisangivakatshela. Ezinye izihlobo kazisafuni lokukhuluma lathi ngenxa yokuhlukuluzwa kwami yizikhova zisithi ngiyazibikelani emphakathini, okokuthi abanye ngacina sengibabuza ukuthi pho izikhova lezi ngezenu yini?,” utsho njalo uSamuriwo etshengisa ukukhathazeka okukhulu.
Uthi nxa umuntu esehlelwa yinkinga ejulileyo izihlobo zingamlahla kumbe zimfulathele.
“Ngikhuluma nje ngiyagula, ilizwe liyangisinda yikho ngikhala emphakathini ukuthi bangincedise lami ngidlule kulokhu ngiphile impilo ekhululekileyo. Nxa inkinga enjengale ingakakwehleli, ubona ngathi ngumdlalo kodwa ngithwele amagabha avuzayo zihlobo zami.
Labo abangathanda ukungincedisa bangangithinta kunombolo ezithi: 0712 795 988 kumbe 0785 482 288,” kuphetha uSamuriwo.
