UMTHUNYWA

UMzoe7 ubuyela eNtumbane

Nkosilathi Sibanda

UMCULI wodumo uMzoe7 ulungiselela ukuphenduka lapho akhulela khona elokitshini leNtumbane, koBulawayo, lapho azakwenza umbuthano womculo ohlose ukukhuthaza intsha ukuthi iqakathekise ikusasa layo, yehlukane lezidakamizwa njalo ikhethe imisebenzi engayithuthukisa empilweni.

Umbuthano lo obizwa ngokuthi Mzoe7 Homecoming uzaqhutshwa ngoMgqibelo eBoozers, kundawo ebizwa ngokuthi ku-C eNtumbane, kusukela ngehola lokuqala emini njalo ukungena kuzabe kuyimahala.

UMzoe7 uthe umbuthano lo kawusiwo wokuzilibazisa nje ngomculo kodwa uyindlela yokuhambisa umlayezo oqakathekileyo ebantwaneni abasakhula, ikakhulu labo abavela emalokitshini.

Uthe bafuna ukukhuthaza intsha ukuthi ingavumeli indawo abakhulele kuyo ukuthi ibavimbe ukuthi baphumelele empilweni.

“Senze lokhu ukuze sikhankasele okuhle elokitshini. Sifuna intsha ibekwazi ukuthi layo ingaphumelela lanxa ivela emalokitshini. Thina njengabaculi kumele sibe yizibonelo ezinhle ebantwaneni abasakhulayo,” kutsho uMzoe7 ekhuluma lephephandaba likazulu ngoLwesibili kuliviki.

“Enye indlela yokwenza lokhu yikuhlangana lentsha, siyenze izizwe ikhululekile ukuba yiyo, siyikhuthaze ukuthi izithembe njalo ibe lamaphupho empilo engcono.

“Mina ngakhulela eNtumbane njalo ngiyaziqhenya ngemvelaphi yami. Ngaphumelela ngivela khonapha, ngikhuthazwe ngabantu abanengi abenza imisebenzi etshiyeneyo, okugoqela ezemidlalo, umculo lokunye okunengi.”

Uthe abaculi balomsebenzi omkhulu wokusebenzisa udumo abalalo ukuguqula impilo zabasakhula, lokubakhuthaza ukuthi bakhethe indlela eqondileyo njalo babe lamaphupho.

Umbuthano lo uzahlanganisa inani elikhulu labaculi abavela emikhakheni etshiyeneyo, okugoqela uAsaph, Ma9nine, Thandy, Umfanomsotho, Dr Jutar, Willy Power, Slimza, Mawiza, Gadla,

Frosty, Mabax, Umnikaz, Wemphuphu, MC Freddy loPrime Dtexx.

Abanye abazajabulisa uzulu nguSpoonky, Asante Mo, Browny, Thabbz, K-Martin, Bhirio, Mahabhubesi, Mxoexic, Elbee, Killer Nox, DJ Stockiee, DJ Brooklyn, Vuyo The DJ, Sonkomose, Msaigwa Jnr, DJ Ashonzi, Macala, Vuyo DJ kanye leBasotho.

Ngaphandle kokuzilibazisa ngomculo, umbuthano lo uzaqhubeka ukhuthaza umkhankaso othi #SayNoToDrugs, oqondiswe ekulwiseni ukusetshenziswa kwezidakamizwa, njalo ukhuthaze ukuthuthukiswa kwezokuvakatsha emalokitshini.

“Sikhangelele ukuthi umbuthano lo uhlanganise izakhamizi zeNtumbane labathandi bomculo, unike abasakhulayo ithuba lokuxhumana labaculi lokuthola umlayezo wokuthi imvelaphi yomuntu kayivimbi umuntu ukuthi aveze amaphupho akhe,” kutsho uMzoe7.