UMTHUNYWA

Indandanda koBulawayo le-Asante Mo

Mthabisi Tshuma

IQEMBU lezomculo ele-Asante Mo selilungiselela ukuletha umbukiso walo obizwa ngokuthi “Indandanda Modi ya Afrika — Afro Tech” edolobheni lakoBulawayo mhlaka 27 Lwezi, ozakwenzelwa e-The Hub.

Umbukiso lo uza ngemva kweminye eyake yenziwa eHarare njalo uhlanganisa umculo wesiNtu lowakulezinsuku, kusetshenziswa umdumo we-electronic.

Kuhlanganiswa njalo lemigido, umbukiso wezembatho abaculi abadlala izigubhu. Umbukiso lo, ngokutsho kwabaqoqi bawo, uzaqhutshelwa phandle egcekeni abantu bebuka inkanyezi.

Bathe bakhethe ukuthi indawo yokuhamba kwalabo abazabukisa izembatho ingabi yisiteji esiphakanyisiweyo njengokujayelekileyo, kodwa ibe sezingeni elifanana lababukeli ukuze kube lokugudlana phakathi kwabaculi lalabo abazabe bekhona.

Abanye abaculi abakhangelelwe ukungena esitejini nguMzoe7, uDakudu, uMboo Nihel kanye loLemoniq.

Umbukiso lo uzaphinda ube yisikhathi sokukhumbula ingcitshi yezobuciko uFather K, osanda kwedlula emhlabeni. Ngenxa yomsebenzi wakhe kwezobuciko, ikakhulu kuVintage Art, abaqoqi bomcimbi bazalungiselela umbukiso okhethekileyo weVintage Runway wokumhlonipha.

Omunye wabasunguli be-Asante Mo uDaiza uthe balindele ukuthi umbukiso lo ulethe indlela entsha yokuzwisisa umculo, imvunulo lamasiko ase-Africa.

“Indandanda yikukhala kwesigubhu esenziwe ngendlela eyehlukeneyo, kusetshenziswa ivili lebhayisikili elingelancingo. Ukuthi Modi ya-Afrika kutsho i-Africa yakhathesi. Ngakho-ke Indandanda Modi ya Afrika imayelana lokuhlanganisa amasiko ethu lendlela esiphila ngayo lamuhla.

“Umbukiso ozayo uzakuba lamandla njalo uthokozise abantu, ubabisele ezimpandeni zamasiko ethu. Kuzakuba lombukiso wezembatho ozakwenza ubusuku lobu bube mnandi. Ama-DJ labaculi abaphambili bakoBulawayo bazasekela i-Asante Mo ngemidlalo etshiyeneyo. Kuzakuba njalo lomcimbi wokwamukela izethekeli kukhaphethi ebomvu,” kutsho uDaiza.

Uthe umbuthano lo uzaqhubeka njalo unika abantu ithuba lokukhumbula impilo lomsebenzi kaFather K.

“Ngenxa yokuhlonipha umngane wethu uFather K, odlule emhlabeni kumaviki asanda kwedlula, sizakwenza umbukiso weVintage Runway wokumkhumbula.
“Siyaqala ukuyenza koBulawayo. Besesike senza eminye eHarare, kodwa khathesi siyiletha ekhaya,” kutsho uDaiza.