admin
Johas Moyo
ABE-AGRITEX sebekhuthaze abalimi botshinda ukuthi baludobhe ngonanzelelo utshinda lwabo andubana balufake ngezigaba zalo ukuze bangalahlekelwa yinzuzo yabo nxa sebeluthengisa.
UMnumzana Davison Masendeke onguProvincial Agronomist esabelweni seMatabeleland North ukhuthaza abalimi botshinda ukuthi baqogelele utshinda lwabo balufake ngezigaba (grading) kusiya ngokuthi luhlanzeke okunganani.
“Sikhuthaza abalimi ukuthi babekwazi indlela efaneleyo ekhona eyokwehlukanisa utshinda ngezigaba kusiya ngokungcola kumbe ngokuhlanzeka kwalo.
“Lokhu kuyabanceda kakhulu ukuthi benelise ukugqiba kuhle amabhelo abo,” kutsho uMnu Masendeke.
Uthe abalimi botshinda kumele bakwazi ukuthi bangavuna utshinda lwabo bahle bagamule izihlahla lezo bazitshise ngoba zicina zibangela izibungu ezihlasela utshinda.
“Nxa izihlahla zotshinda zingasatshiswanga kubanzima kakhulu ukubulala izibungu ezibakhona kutshinda njalo zenza lotshinda lolo lungabiluhle.
“Imihlobo yezibungu eyenqatshelwa ngokutshisa izihlahla zotshinda igoqela imihogoyi ebomvu (red ball) oyiwo oyingozi kakhulu ngoba uyangena phakathi kwesihlahla udle amabhola uphakathi.
“Kule-African Ball Worm odla uphandle njalo lowo uyabe ulula ukuthi umlimi engafafaza ngomuthi ufe,” kuphetha uMnu Masendeke.
Online Reporter