admin
Nkosilathi Sibanda
ABADLALI beTsholotsho FC labo sebekhethe ukuhlangana lenengi lezisebenzi ezilove emsebenzini ngoLwesibili langoLwesithathu kuliviki.
Iphephandaba likazulu lizwe ngokugcweleyo ukuthi iZiqholo zeZhwane ziphenduke zaba yiziqholo okweqiniso ngokwala ukulolonga kusukela ngoLwesibili.
Isikhalazo sabadlali laba ngesokuthi bancitshwa iholo labo njalo bakhalela ukuphathwa njengalokho okwenziwa ngamanye amaqembu adlala kuPSL.
UMthunywa ucwayisise loludaba kwatholakala ukuthi inkinga ekhangelane leTsholotsho yikusilela kwesikhwama semali. Inkinga le yaqala ngesikhathi usomabhizimusi weTsholotsho uMandla Manyathela esetshiye ukusekela ithimu le.
UManyathela ubeyinsika yokuqhuba kwenhlelo zaleliqembu kodwa okwamanje inkokheli eziseleyo zidonsa nzima ukuholisa abadlali.
NgoLwesibili abadlali bakhethe ukuthi abayetshaya amangqetshane enkundleni yeWhite City betshela abaqeqetshi ukuthi angeke balikhabe nxa imali zabo zingabhadalwanga.
Ngeviki edluleyo uManyathela utshele iphephandaba likazulu ukuthi okwenzakala kulithimu kwaziwa yilabo abaphakathi.
“Ayithengiswa ithimu. Izisebenzi eziphakathi kweqembu labadlali, bayazi ukuthi iTsholotsho FC imi ngaphi njengeqembu,” kutsho uManyathela ngemva kokuphendula umbuzo mayelana lokuthengiswa kwethimu le.
Abadlali abakhulume ngodaba lwabo bebekhanya ukuthi bacunukile ngesiphatho abasithola kuqembu labo.
“Indaba ekhona lapha ngeyemali. Asiholi kuTsholotsho FC kodwa bafuna ukuthi sidlale sinqobe. Abantwana bayalamba ezindlini. Okubuhlungu yikuthi labasekeli bethimu bathi kumele sinqobe bona besazi isimo sethu,” kutsho umdlali weTsholotsho FC owesabe ukuqanjwa.
Omunye wabaqeqetshi laye oyesabe ukuthi aqanjwe ngebizo uthe akulanto abangayenza ukuthi bancenge abadlali ukuthi baqhubeke ngokulolonga.
“Abafana bakhala ngezimali zabo. Sekuyisikhathi sihlezi lapha singalolongi,” kutsho lumqeqetshi.
UMthunywa utshaye ucingo lukamgcinisihlalo weqembu uMlamuli Phiri okwamahlandla amanengi kusukela ngoLwesibili kodwa kazange aludobhe.
Ukukhalala ukudlala okwenziwe ngabadlali kuzaphazamisa amalungiselelo alithimu kumdlalo wayo leMutare City enkundleni yeWhite City.
Eminye imidlalo yePSL kulimpelaviki:
NgoMgqibelo: FC Platinum v Caps United (Mandava), Tsholotsho v Mutare City (White City), Chapungu v Chicken Inn (Ascot), Harare City v How Mine (Rufaro), Ngezi Platinum v ZPC Kariba (Baobab).
NgeSonto: Highlanders v Triangle (Barbourfields), Hwange v Bulawayo City (Colliery), Dynamos v Border Strikers (Rufaro).
Online Reporter