admin
Cornelius Luphahla
IZAKHAMIZI zesigabeni sakoPhulula eLupane zikhala ezimathonsi ngenxa yamakhanka aseziqedele izilimo esidla okuyinto emangalisayo njalo eqalayo ukwenzakala kule indawo.
Kubikwa emasimini sekubetha umoya nanko phela amakhanka la adla umumbu kanye lamakhabe ngendlela engakaze ibonakale.
UMthunywa ukhulumisane lesinye isakhamuzi sakule indawo uNkosazana Sipho Thebe ochaze ukuthi amakhanka la selesikhathi eside aqala ukudla izilimo zabo.
“Amakhanka la selesikhathi eside aqala ukusidlela umumbu kanye lamakhabe sokuze kungaselalutho emasimini.
Lokhu kuyasidanisa ngoba lokhe sahlala lapha amakhanka kawazake akwenze lokhu. Esikwaziyo yikuthi adla imbuzi kanye lenkukhu hatshi okwalonyaka asesidla lezilimo,” kutsho uNkszn Thebe.
Ekhuluma lentatheli uMnumzana Shadreck Sibanda uveze ukuthi sebeswele ukuthi bengenzani ukuze bavikele izilimo zabo emakhankeni la.
“Amakhanka la enza iziga sibili ngoba engadla atshiya ebuthelele iziqu ndawonye kuthi amakhabe atshiya ingebhezi kuphela. Khathesi sesiswele ukuthi singenzani njengoba amakhanka la ehamba ebusuku. Uhlupho yikuthi singawathiya siyabotshwa njalo kawalindeki njengoba ehamba ebusuku.
“Okusuka kuzwise kakhulu ubuhlungu yikuthi lonyaka yindlala njalo amakhanka la aqala asidlela imbuzi lenkukhu sasesithembela ezilimweni khathesi sephendukela kizo,” kulandisa uMnu Sibanda.
UMthunywa wenelise njalo ukukhulumisana lesinye isakhamuzi sakule indawo uMnumzana Aleck Ndlovu obike ukuthi ukwanda kwamakhanka kule indawo kuyingozi ngoba athelela izinja umkhuhlane wobhova.
“Ukwanda kwamakhanka kule indawo kudala ingozi ezinengi kakhulu esigabeni. Ngikhuluma nje izinja ezinengi kule indawo zilomkhuhlane wobhova eziwuthelelwa ngamakhanka la,” kuchaza uMnu Ndlovu.
Umlimisi wesiqintini sakoGodlwayo uNkosazana Connie Msipha ebuzwa ngale indaba yokudla kwamakhanka umumbu uchaze ukuthi kuyenzakala njalo ayingozi.
“Kuyenzakala sibili ukuthi amakhanka adle umumbu njalo awudla kakhulu nxa usasengamachaphazi. Lokhu kuyehlisa isivuno somlimi ngoba nxa umumbu lo usasengamachaphazi amakhanka ayabe esidla omnengi kakhulu,” kuveza uNkszn Msipha.
Imizamo yokukhulumisana lomkhulu weForestry Protection Unity okule indawo ngaphansi kwenhlanganiso yeForestry Commission uMnumzana Dumezweni Ndlovu yehlule ngoba ucingo lwakhe lwalile ukungena.
Online Reporter