Online Reporter
IZOLO ngisakhula sasithi singaqeda ukusenga, sakleza siphume lazo inkomo size siyephenduka selingomutsha wendoda. Minengi imidlalo esasitshona siyidlala ebalisela ukuqwaqwazana ngemiqwayi, ukuzingela, ukuthiya amajuba lokuzwana amandla.
Ingqwele yayikhetha abantu ngababili efuna ukubaxega benzelwe amabele amabili kuthiwe ozaqala ukudiliza kutsho ukuthi uzimisele ukulwa besekuqala ke.
Kwakungadojwa godo kumbe ilitshe kwakuqondwana ngezibhakela zitshe indoda ize ivume ukuthi siyehlulwe kube sokulanyulwa. Langekhaya kwakungakhulunywa ukuthi usibani banyana utshaywe nguzibani kwakuphelela khonale emadlelweni.
Lamhlanje into zijikile abafana bakhathesi inengi labo nxa kuthiwe balwile bahloma baphelele njengamalwa ecatsha uthola belengqamu, amabhemba abanye bathwala sibi senkafulakufa.
Ngiyake nginanzelele ikakhulu endaweni zokuthokozela ezifanana lemabhawa nxa kuqhamuka ingxabano uzakuthi usalibele ubone sejuluka igazi omunye esegwaziwe ngengqamu, kumbe esedobhe inkalakatha yembokodo afune ukucobodisa ngesikhatshana uzabona sokulamapholisa sekubotshwa abantu.
Thina yayikhala ingqindi ungasoze ubone umuntu ejuluka igazi ngaphandle kokuthi nxa umuntu ethe watshaywa emakhaleni waphuma umungula ingqwele yayiwumisa umdlalo ungaphela kuqalwe phansi kuze kutholakale intshantshu, wawungeke uzwe sekuze kuthiwa kucine kufika enkambeni.
Khathesi angazi ukuthi inengi lentsha selangenwa yimpehlani bani emakhanda nxa bezikwejisela ezindaweni zokuthokozela, kukanengi sibala kumaphephanda kumbe sisizwa emisakazweni lakubomakhalekhukhwini ukuthi ontanga bagwazane omunye wacina esedlula emhlabeni.
Esigabeni sakithi bakhona abafana ababulala umngane wabo ngebhemba ngikhuluma kunjenje basejele, into edanisayo njalo ezwisa ubuhlungu yikuthi ngabafana abancane inkakhayi zabo zisebuthakathaka abalalalutho abazali yibo asebethwele nzima ngokukhokha izimali kunye lendleko zomngcwabo.
Khonapho kuthe kuphenyisiswa kudingwa ukuthi besekutheni baze babulale umngane wabo kwatholakala ukuthi bekubangwa umhlanga wegwayi akade bewubhemisana.
Thina sisakhula sasitshona sidlala imidlalo efana lebhola lokuncintisana, sigijima sasiqinile uthi ungakhangela izigcuma zethu kwakungani ngezebutho likaTshaka. Abakhathesi inengi labo liyaxega mhlawumbe yikho okwenza bacine sebesilwa ngezikhali.
Ayixabene.
