admin
YiNtatheli kaMthunywa
USEYIDLALELE waphinda wayibalekela, usephendukile futhi.
Le yiyo indaba kaRahman Kutsanzira umdlali wenguqu osanda kwenza isivumelwano sokudlalela iqembu leHighlanders kulisizini.
Umdlali lo, ovela kuFC Platinum, usephendukile kuqembu elavumbulula ithalenta lakhe esasengumfana enkundleni yeBarbourfields.
Usayine ngeviki edluleyo, njalo kubonakale kulinyathelo elihle kubalandeli beTshilamoya ngoba bekholwa ukuthi uzavala isikhala ebesikhona esiswini senkundla.
Usuka kuFC Platinum kwakhiwe nanko uthwale inkezo ezimbalwa ekuleliqembu engaphansi kukamqeqetshi uNorman Mapeza.
NgoLwesithathu emini, iphephandaba likazulu lixhumane lomdlali lo oveze ukuba ukuza kwakhe kuHighlanders yikuzoqedela umdlalo wakhe lokuthi ancedise iqembu leli lithwale inkezo yeCastle Lager.
“Sengiyithwele leFC Platinum, sengifuna ukuyithwala kuHighlanders, iqembu elangivula amehlo. Ngize ukuzobonga imuli yeHighlanders ngokuhlala ingisekela.
Ngisadlala kuFC Platinum, abasekeli beHighlanders babengikhuthaza, ngifuna ukubanika isipho.”
Umdlali lo ubesebizwa ngelithi “Mbeppa” eZvishavane, la okudabuka khona iqembu akade elidlalela ngoba bethi udlala njengomdlali weFrance olebizo elifanayo.
Kusukela eqala ukugijima kunkundla zePSL ngesizini ka-2008, uKutsanzira ubenconywa ngabaqeqetshi ngokwenelisa ukugiqa unobhutshuzwayo kuzo zonke indawo zenkundla.
Utshele uMthunywa ukuthi wayekuhlelile ukuba uzaqedisela umdlalo wakhe kuleli ekuBosso.
Umdlali lo lokhe elesifiso sokuthi afinyelele kwamanye amaligi anduba athathe umhlalaphansi.
“Mhlawumbe ngingaqedela kuHighlanders kodwa ngisafuna ukuya kwamanye amaqembu, ikakhulu kwamanye amazwe. Ngisase lawo amandla. Kuzabonakala lokhu.
UKutsanzira uza kuHighlanders elobungcitshi abuthaphe kumidlalo yeChampions League kumasizini adluleyo.
Kukhangelelwe ukuthi umqeqetshi weHighlanders uMandla Mpofu amsebenzise lumdlali nxa efuna impumela engcono kulisizini.
Online Reporter