Innocent Kurira
UMPHATHINTAMBO wogatsha olubona ngezeMidlalo, Ezokuzilibazisa, Ezobuciko kunye lezaMasiko uLt-Gen (Rtd) Anselem Nhamo Sanyatwe usecele ukuthi kube lenguquko kwezemidlalo, eveza ukuthi kumele zibe libhizimusi lokukhulisa umnotho welizwe.
USanyatwe, obemele uMsekeli kaMongameli uConstantino Chiwenga ekuvulweni ngokusemthethweni kwe-Kuzana Sport and Creative Economy Expo koBulawayo izolo, uthe isikhathi sesifikile sokuthi ezemidlalo zingabi ngezokuzilibazisa kuphela.
“Sidinga inguquko enkulu kundlela esiqhuba ngayo ibhizimusi lezemidlalo. Ezemidlalo akumelanga zibonwe njengokuzilibazisa kuphela. Kumele zithathe indawo yazo efaneleyo ziphathwe njengebhizimusi,” kutsho uSanyatwe.
Amazwi kaSanyatwe abeke isisekelo seSport Industry Conference, eyingxenye yeKuzana Sport and Creative Economy Expo eqale ngoLwesithathu koBulawayo njalo eqhubeka kuze kube mhlaka 11 Mfumfu.
USanyatwe uthe ukuguqula ezemidlalo kube libhizimusi kudinga ukuthi abakhokheli bangakhangeli umncintiswano kuphela, kodwa babone lamathuba angakha amabhizimusi ahlala isikhathi eside.
Uthe ezemidlalo zingavula amathuba afana lokuthola abaxhasi, ukusakazwa kwemidlalo, ezemidlalo ezihambelana lokuvakatsha, ukwakhiwa kwenkundla, ukuthengiswa kwempahla zamaqembu lokuthuthukiswa kwabadlali.
IKuzana Sport and Creative Economy Expo ihlose ukuba yindawo lapho inhlanganiso zezemidlalo, abadlali, osomabhizimusi labaxhasa ngezimali abangahlangana khona bakhangele amathuba, njalo baqinise ubudlelwano phakathi kwezemidlalo lomnotho welizwe.
