Lovemore Dube
OBEDUME ngokusekela inhlelo zebhola lezabelweni uCharles Chunda kasekho.
UChunda obeleminyaka yokuzalwa engu-65 udlule emhlabeni ngeSonto esibhedlela seMpilo ngemva kokugula isikhathi esifitshane.
UMkhokheli weZimbabwe Football Federation For Amateur and Social Leagues (Ziffasol), uFrancis Zimunya wethule amazwi enduduzo kumlayezo awufake kunkundla zokuxhumana.
“Kuyadanisa ukwamukela umbiko ngokwedlula emhlabeni kweqhawe uCharles Chunda. UChunda ubengumsekeli kaMkhokheli weZiffasol, umdlali wenguqu odumileyo, futhi wake waba ngumgcinisihlalo weZimbabwe Paralympics Games njalo engunobhala jikelele lomgcinisihlalo weBulawayo Amateur Football Association (Bafa) okweminyaka edlula engu-30. Khathesi
ubesengumxhumanisi we-Zimsports for ED Paralympics.
“Silahlekelwe kakhulu ekuthuthukisweni kwezemidlalo ngoba ukhokhele inhlelo ezinengi zokuthuthukiswa kwemidlalo koBulawayo laselizweni lonke jikelele,” kutsho uZimunya.
UChunda wafunda eMpopoma High Scholl njalo ukudlala waqala esesikolo.
Wadlalela amaqembu ambalwa agoqela iRed Seal Rovers kuDivision One leChronicle, Chronicle
NGA le-Amavevane kuSocial League.
UChunda usebenze kumankampani abalisa iNational Foods, Barons Motor Spares, Zimpapers
(Chronicle) kanye leZulu Lithium lapho atshiye khona umsebenzi ekuqaleni komnyaka.
Indodakazi yakhe, uNatasha Chunda uchaze uyise njengendoda ebisazi ukwehlukanisa isikhathi semuli lesokwenza imisebenzi yakhe yezemidlalo.
“Ubaba ubelothanda esehlukanisa isikhathi senguqu lesemuli. Ubezehlisa kakhulu ebantwini njalo ubekhathazeka nxa kulomuntu ophakathi kohlupho,” kutsho uNatasha.
UChunda uzabekwa koBulawayo eMvutshwa ngoLwesihlanu.
Utshiye unkosikazi labantwana ababili; uNtasha loJimmy labazukulu abalitshumi.
