Lovemore Dube
ABALANDELI bezemidlalo kuleli basele bebuzana ngoLwesibili ntamabama ukuthi kungabe sokulembazane yomdlalo wenguqu entsha.
Izingxoxo lezi zibekhona ngemva kokunanzelela indlela umdlali wamaYoung Warriors, uElisha Pfupa abekhethuza ngayo njalo wenelisa ukuthela emambuleni amabhola amathathu kumdlalo weLos Angeles Olympics obusenkundleli yeCote d’Or National Sports Complex, eMauritius.
IZimbabwe ihambe kumncintiswano lo ngemva kokunqoba 2-0 kuviki edlulileyo eNational Sports Stadium.
Loba abafana behambe bengakhangelelwanga ukuthi bazenza izimanga ngenxa yokunanzelela umumo womkhathi kodwa bafike badlala ngendlela ejabulise abanengi nanko baphakamise umdlalo wabo benelisa ukunqoba nge 4 – 1.
Abafana sebezadlulela kumdlalo olandelayo lapho iZimbabwe ezadibana leMali kubanga elilandelayo ukuze bathole indawo yokudlala kuma-Olympics.
UPfupa ubeliqhawe lesizwe ngokutshayela amabhola amathathu emambuleni okuyinto engavamanga. Uhlohle ngemva kwemizuzu engu-14, 19 le 40.
Elesine lihlohlwe nguDavid Chigwada kungakayiwa kukhefu.
Ngemva kwekhefu iMauritius iphenduke isilolaka isesaba ukuthi kungabuye kungene amanye amabhola.
Umbuzo osele umi ngothi uPfupa kungaba ngumdlali ozathwala iZimbabwe?
Longumbuzo impendulo ezabonakala ngokuhamba kwesikhathi.
