Ugwalo: Ukuthunjwa kukaSukuzukuduma
Olwalotshwa
nguGeshom MP Khiyaza
Sikumbuzo Dabengwa
Kugwalo uSukuzukuduma, uMsakade uvezwe njengomlingiswa owayekhuthele. Sibona emelana lokwelusa umhlambi wezinkomo zakoSinyoro abuye asetshenziswe yingqwele egangeni asebenze engelakukhonona.
Wayengumjimbi omkhulu obatshazwa langabadala. Sibona kugwalo ehlala ejimbile inyamazana ayezihlaba ngomkhonto wakhe awuphiwa ngokulwa laMasakade. Izikhwehle asibali, zazidliwa nguMaGumbo loSinyoro nxa eze lazo ekweluseni.
USukuzukuduma wayengumntwana obekezelayo kundaba ezibuhlungu. Wayethathelwa amanqina ayewajimbile azithulele ngokubekezelela izinhlupho egangeni langekhaya koSinyoro.
USukuzukuduma kugwalo uvezwa engumesulelwa. Imuli kaSinyoro, ikakhulu abantwana oMajeyi laboSiwoga babesesulela kuye amacala okweba. Sibona bentshontsha inyama yolimi ekaSinyoro bethi babone uMsakade ephuma endlini leyo eyayilolimi betsho besithi huu amanga.
UMsakade ubuye avezwe kugwalo engumuntu olesibindi. Wamisana laMasakade athi emgwaza wangcothula umkhonto wahle wabaleka lawo waba ngowakhe ayesesebenza ngawo. Wabongwa phambi kwabantu lasenkosini eyaze yamnika imbuzi njengesibonakaliso sesibindi.
Ubuye avezwe engumlingiswa oyingwazi. Sibona esilwa leNcandemabala eyigwaza eyibulala ngokuyiqhaqha ayibulale ize ife, ayihlinze athathe isigogo sayo. Lokhu kwaba yisimanga kulaba bantu baseButhembula lakoSinyoro.
USukuzukuduma uvezwa engumlingiswa olalelayo. Sibona elalela yonke into ayitshelwa ngabadala, amadlozi emaphutsheni akhe enze ngendlela alayelwe ngayo ngabaphansi.
Ungumuntu olesineke. Sibona ebekezelela uMaGumbo omncitsha ukudla amthathele inyamazana lezinyoni ayezijimba ezidlela lomkakhe cala celeni yena angabi landaba lakho konke lokhu akutshaye indiva.
USukuzukuduma uvezwe njengomlingiswa oyisigqili. Uyasebenza koSinyoro eselusa imihlambihlambi yezinkomo abanye ababeyiholela yena eswela lokudla nje lokhu, engelambadalo.
Ungumlingiswa owayelodumo kukho konke ayekwenza. USukuzukuduma wayelodumo ezintweni ezinengi ayezenza esasemncinyane. Sibona ebatshazwa ngabadala ngokuzingela ajimbe, ukulwa laMasakade engumntwana kanye lokubulala iNcandemabala ayihlinze eyedwa.
Asihlanganeni kwelizayo bafundi.
