Online Reporter
Brandon Moyo
NGEMVA kokudlala kuhle ikhilikithi okweminyaka engamatshumi amabili, uSean Williams uzatshiya iqembu lamaChevrons ekupheleni komnyaka, kubika iZimbabwe Cricket (ZC).
Kumbiko wayo, iZC ithe isizatho sokuthi kungavuselelwa isivumelwano loWilliams yikuthi umdlali lo kazange abonakale ukuthi akhethwe kuqembu elidlala ku-ICC Men’s T20 World Cup Africa Qualifier eHarare. Umdlali lo, kubikwa wayebalekela ukuhlolwa izidakamizwa emzimbeni.
Kubikwa uWilliams uzikhulumele yedwa ukuthi ukhathazwa yizidakamizwa njalo usephakathi kokuthola usizo.
“IZC ifuna ukuthi bonke abadlali balandele imithetho, bahloniphe njalo baqaphele ukusebenzisa izidakamizwa. Kutholakale ukuthi uWilliams ulembali yokungatholakali emidlalweni lokungahloniphi, okuphazamise amalungiselelo eqembu.
“Loba i-ZC imncoma ngokudinga usizo, ukungabi khona eqenjini ngesizatho sokubalekela ukuhlolwa izidakamizwa kutshengisa ukungahloniphi. Ngemva kokucabangisisa, iZC isiphethe ngokuthi uWilliams ngeke esakhethwa eqenjini lelizwe,” kutsho iZC.
Inhlanganiso le ithe imtshayela ihlombe ngokudlalela ilizwe kakuhle.
“Ngeke sengeze isivumelwano laye phambili kuka mhlaka 31 Mpalakazi 2025. Ngokunjalo I-ZC ibonga kakhulu njalo iyakuthokozela ukuthi wenza kuhle emdlalweni wekhilikithi yeZimbabwe kuminyaka engamatshumi amabili edluleyo.
UWilliams waqala ukudlalela ilizwe mhlaka 25 Nhlolanja ngo2005. Udlale ama-ODIs angu164. Wadlala kuma-Test angu24 njalo wakhethwa kumidlalo yamaChevrons engu273.
