Online Reporter
Gift Moyo
IQEMBU lemigido yesiNtu lakoBulawayo, eleZimnyama Arts Ensemble, selikhethwe kumiklomelo yomhlaba kuCreative Artist of the Year kumaGood News For Life Global Awards, azakwenziwa e-United Kingdom ngoNcwabakazi lonyaka.
Iqembu leli likhethwe ndawonye lomculi uSisa Senkosi kumiklomelo le.
Omele iqembu uPhibion Ncube uthe ukukhethwa lokhu kulinyathelo elikhulu njalo kuyabakhuthaza ukuthi baqhubeke ngomsebenzi.
“Lokhu kukhulu kithi ngoba ngokokuqala ukuthola ukubonakala emhlabeni wonke kusukela saqala umsebenzi wethu wezobuciko bezomgido. Siyabonga kakhulu ngalokhu ngoba kutsho okunengi eqenjini,” kutsho uNcube.
Uthe lanxa iqembu selake lanqoba imiklomelo efana leNational Arts Merit Awards leBulawayo Arts Awards, ukukhethwa kumiklomelo yamazwe omhlaba kuyinto eqakatheke kakhulu kubo.
“Kuyasikhuthaza ukubona umsebenzi wethu uqatshelwa emhlabeni wonke. Lokhu kusenza siziqhenye njalo kusikhuthaza ukuthi siqhubeke sisebenza nzima ukuze sithole amanye amathuba emhlabeni wonke.”
AmaGood News For Life Excellence Awards aqalwa ngenhloso yokuncoma ithalenta lomhlaba wonke, lapho abantu abenza kuhle kwezobuciko, amabhizimusi, impilo lobukhokheli.
