adminGURUKOTA rinoona nezvenharaunda, mvura nemamiriro ekunze, Cde Saviour Kasukuwere, vanoti zvakakosha kuti vana vechikoro vadzidziswe machengeterwo akanaka enharaunda nezviwanikwa sezvo iri iyo nhaka yavo yemangwana.
Vakataura mashoko aya kuMukuvisi Woodlands, muHarare nguva pfupi yadarika pachiitiko chekukurudzira kuchengetedzwa kwakanaka kwenharaunda nezviwanikwa icho chakarongwa neUnicef.
“Vana vechikoro vanofanira kukura vachiziva kuchengetedza miti, mvura nematoro. Vanofanirwa kuziva mitongo inopihwa kana munhu awanikwa aine mhosva yekutema miti, kupisa masango nekuchera-chera nharaunda zvisiri pamutemo.
“Vana vechikoro vanozokwanisa kuudzawo vari kudzimba nemumunharaunda kuti vazive kukosha kwekuchengetedza nharaunda,” vakadaro Cde Kasukuwere.
Zvakadaro, environmental education co-ordinator kuMukuvisi Woodlands, VaGibson Nhokwara, vanoti kubva gore rino richitanga, vakwanisa kupa ruzivo pamusoro pekuchengetedzwa kwenharaunda kuzvikoro zvepuraimari nesekondari zvakawanda izvo zviri kumatunhu akasiyana enyika. “Sangano redu riripo pakudzidzisa nekupakura ruzivo kune vana vechikoro nenyika yese takabatana nebazi renharaunda, mvura nemamiriro ekunze,” vakadaro.
Zvikoro zvakatangawo zvakare kuita makirabhu ezvirongwa zvekuchengetedza nharaunda nemamiriro ekunze, kurima nekusima miti. Zuva iri rakaona zvikoro zvakasiyana, zvinosanganisira ZRP Primary neDadhley Hall Primary, zvichipihwa mibairo yekugona kuchengetedza nharaunda pasi pechirongwa cheEco Schools Programme.
Online Reporter