admin
EL-Hadji Diouf anoti anofunga kuti Mario Balotelli akakundikana kubudirira kuLiverpool nekuti aimbove kaputeni wechikwata ichi, Steven Gerrard, aigodoka naye.Nguva yaBalotelli – iyo yainge yakaoma zvikuru kuAnfield – yakasvika pakupera apo akazotengwa neNice mwaka uno. Chizvarwa chekuItaly ichi chakatanga zvinodakadza apo chakanwisa kaviri mumutambo wacho wekutanga kuchikwata chemuLigue 1 ichi pachakakunda Marseille 3-2.
Diouf anoti haashamisike kuona Balotelli achitamba nhabvu inonwisa mvura kuchikwata chake chitsva, ndokuti dai Gerrard ange asingapindire munyaya dzevamwe vatambi angadai akabudirira chaizvo kuLiverpool.
“Ndakamuudza kuti usaenda kuLiverpool. Kwanga kusiri kwake uko, nekuti zvinhu zvaisazomufambira zvakanaka nekuda kwaGerrard, uyo asina tarenda rinenge rake uye aizongotaura zvakashata pamusoro pake,” akadaro.
“Gerrard ane godo hombe, murume asingafarire vamwe vatambi vanogona. Mario munhu akanakisa chaizvo waunofanirwa kuterera. Haasi munhu anokonzera mhirizhonga muchikwata.
“Zvinhu zvakawanda zvanyorwa pamusoro pake. Vanhu vanotaura zvakawanda nezvake, asi zvizhinji ndezvenhando.” – Daily Mail Football.
Online Reporter