admin
Ncekwenhle Ncube
NGENHLOSO yokulwisa kanye lokuvikela ukumemetheka kwegcikwane leHIV andAIDS inhlanganiso yeNational AIDS Council yenze umncintiswano wezikolo zaphansi laphezulu ngenhloso yokufundisa abasakhululayo ngendlela zokuziphatha ukuze baphephe engozini zokubamba umkhuhlane lo.
Kumncintiswano lo lapho obekudibene izikolo ezilitshumi lasificamunwe munye bezikolo zakoBulawayo ngoLwesihlanu kuviki ephelileyo eCity Hall abafundi bazuze ithuba lokuncintisana ngokuphendula imibuzo emayelana lokumemetheka kwegcikwane langendlela abangazivikela ngalo.
Isikolo esibe yintshantshu kuzikolo zeSecondary yiNketha High ngemva kokubhuqa izikolo eziyisifica munwe munye.
IMpopoma High yaba ngeyesibili kwathi iSobukhazi High yadonsa emsileni. Isikolo seNketa sithole umvuzo wemali engange$500.
Ezikolo zePrimary iNgwalogwalo yiyo ekhokhelilyo yathola umvuzo we$500, kunombolo yesibili kwakuleMtshane leMgoqo zona ezaphiwa i$400 kwathi iMahatshula yathola ikhulu lamadola njengoba kuyiyo ebisemsileni.
UNkosikazi Musa Sibindi obeyisikhulumi kumncintiswano lo ugcizelele ukuthi injongo yomncintiswano lo yikupha abafundi ulwazi oluzabenza bahlale beqaphele ingozi abangazithola bekiyo nxa bengazivikelanga kumkhuhlane lo.
“Umqhudelwano lo ujonge ukuthi sibone intshantshu phakathi kwenu bafundi kulwazi elilalo mayelana legcikwane leHIV. Kungakho-ke abazaba zintshantshu bazaphiwa umvuzo.
“Ngaphandle kokuzuza imvuzo le, sikhangelele ukuthi wonke umfundi kanye labo bonke abanxusiweyo ukuthi bazithaphele ulwazi ngokuzigcina kuhle noma ulalo igcikwane kumbe ungelalo,” kutsho uNkkz Sibindi.
“Ilizwe lakithi njengawo wonke amanye amazwe asezansi yeSahara lilokhe lidodombela lilwisana leHIV njalo kukhanya umkhuhlane lo uhlasela ontanga abayibo futhi abakhangelwe ukuthi babe lendima enkulu yokuthuthukisa ilizwe.
“Kuyikho sikhethe ukufundisa lina lamuhla ngoba liqakathekile elizweni,” kutsho uNkkz Sibindi.
Ekuchwayisiseni okwabakhona ngomnyaka ka2012 umhlaba wonke nje jikele kwatholakala ukuthi inengi labantu abatholakala belegcikwane babeleminyaka ephakathi kwengu-15 kusiya ku-24.
UMqondisi wezemfundo uMnumzana Dan Moyo uphethe ngokuthi abasakhulayo baziphathe bengazitshaphazi ngoba bengabakhokheli bakusasa.
Kubikwa izikolo ezenze kuhle yizo ezizakuyadibana lezinye eHarare lapho okuzahlangana khona izikolo zonke zakuleli.
Online Reporter