Online Reporter
Ethel Ncube
ABALIMI besigabeni seMatebeleland sebekhuthazwe ukuphatheka ku-Horticulture ngoba ingabalethela inzuzo yakwamanye amazwe.
I-Horticulture yindlela yokulima egoqela ukulima izilimo ezinjengamaluba, imibhida, amakhowa, kanye lezithelo.
Linkuthazo iza ngemva kokuba kunanzelelwa ukuba umkambo wezilimo ze-horticulture uyakhula.
UNkosazana Siphiwe Dube ongumlimisi esabelweni seMatabeleleland North uthe abalimi kabagxile ekwenzeni i-horticulture ngoba izilimo lezi zingaletha imali yakwamanye amazwe.
“Esigabeni seMatabeleland abalimi sibakhuthaza ukuthi benze i-horticulture ngoba kuyindlela yokulima engaletha inzuzo.
“Kulamazwe amanengi awangaphandle esingawathengisela izilimo zethu lezi njalo umkambo wazo muhle.
“Lokhu kutsho ukuthi umlimi uyayithola inzuzo enhle,” kutsho uNkszn Dube.
UNkszn Dube uphinde waveza ukuthi ekadeni izilimo ze-horticulture zazikubanga lesithathu kumabhizimusi aletha inzuzo yakwamanye amazwe.
“Kudala i-horticulture kwakuyindlela ilizwe elalithola ngayo imali yangaphandle ngakho lathi njengabalimi singancedisa ukuvuselela lokhu ngokwenza i-horticulture.
Lokhu kuyisibonakaliso njalo ukuthi umkambo wezilimo zendlela ye-horticulture ubanzi.
Ekuphathekeni ekulimeni izilimo ze-horticulture abalimi kabasebenzise ama-hybrid seeds ukuze bathole isivuno esihle.
“Abalimi abenza i-horticulture kabasebenzise inhlanyelo ebizwa ngokuthi ngama-hybrid seeds ngoba inhlanyelo le ihloliwe njalo kayihlaselwa yimikhuhlane,” kuphetha uNkszn Dube.
