Online Reporter
Blessing Malinganiza
MUTAMBI wekumashure wechikwata chenyika chemaWarriors, Teenage Hadebe, anoti ari kutarisira kuratidza unyanzvi hunoendeka mumwaka mutsva weMajor League Soccer (MLS), uwo wakatanga pakupera kwesvondo radarika.
Mutambi uyu, uyo ane makore makumi matatu okuberekwa, ari kuda kuvaka pamusoro pezvaakaratidza achitambira chikwata cheCincinnati uye kuzvisimbisa semutambi akakosha muchikwata ichi.
“Kugadzirira kwacho kuri kufamba zvakanaka uye ndinofara nebasa ratakaita sechikwata.
“Munhu wose ari kushanda nesimba nokuti tinonzwisisa zvatinotarisirwa mumwaka uno.
“Chinangwa changu ndechokuti ndirambe ndichiratidza unyanzvi hwakagadzikana, ndigare ndiripo kuti ndisarudzwe kutamba uye ndibatsire chikwata pose pandinenge ndapihwa mukana nevarairidzi.
“Kukwikwidzana pamusoro penzvimbo dzekutamba chinhu chakanaka nokuti kunokurudzira mutambi wose.”
Mutambi uyu akaenda kuchikwata cheCincinnati muna Nyamavhuvhu 2024 mushure menguva pfupi yaakapedza achitambira chikwata chekuTurkey chinonzi Konyaspor.
Kondirakiti yake yakazowedzerwa kuti arambe ariko kusvika pakupera kwemwaka wa2026.
Hadebe anoti kujaira chikwata uye kunzwisisa zviri nane maitiro avo ekutamba kwakamuisa pachinzvimbo chakasimba zvikuru mwaka mutsva uyu usati watanga.
“Ndakagara zvakanaka kuCincinnati uye iye zvino ndave kunzwisisa zviri nane maitiro ekutamba echikwata ichi.
“Ndinoda kuvaka pamusoro pezvandakaita mwaka wadarika uye kuva chikamu chakakosha chevatambi vekumashure.
“Makwikwi eMajor League Soccer akaoma zvikuru uye mwaka woga woga unouya nematambudziko akasiyana-siyana.
“Tinofanira kugadzirira zvakakwana uye kuchengetedza mwero wepamusoro mumwaka wose wemakwikwi,” anodaro.
Hadebe akapedza mwaka mitatu ari kuchikwata cheHouston Dynamo mushure mekuendako muna 2021.
Akapihwa mibairo inosanganisira Defender of the Year uye Newcomer of the Year kuchikwata cheHouston mumwaka wake wokutanga, asati abatsira chikwata ichi kuhwinha Lamar Hunt US Open Cup muna 2023.
“Ruzivo rwandakawana rwakandidzidzisa kuti basa rekutamba kumashure harisi renguva dzose rine chokuita nekushanda kwemunhu ari ega.
“Kukurukurirana, kurongeka uye kushanda pamwe chete sechikwata zvinhu zvakakosha kana tichida kuti chikwata chizadzikise zvinangwa zvacho,” anodaro.
Kugadzirira kwaHadebe kuchange kuchitarisiswawo zvakanyanya nevarairidzi vechikwata chenyika chemaWarriors.
“Kumiririra Zimbabwe rukudzo rukuru. Kuramba ndichitamba zvakanaka kuchikwata changu kwakakosha nokuti kunoita kuti ndigare ndakagadzirira pose pandinenge ndadaidzwa kuzotambira chikwata chenyika,” anodaro Hadebe.
