Online Reporter
Lovemore Dube
KUBE yikuseni enhle kwabeqembu leHighlanders ngemva kokuba usomabhizimusi uWicknell Chivayo enikeze abakhokheli beqembu izimota lemali.
Abazathola izimota lemali engange-US$10 000 munye ngamunye ngumgcinisihlalo webhodi uLuke Mnkandla, umaqhuzu uDenzil Mnkandla, umqeqetshi uBenjani Mwaruwari lowayekade eyingcitshi yomdlalo uMadinda Ndlovu.
UChivayo, ngoLwesithathu ekuseni wethule lumbiko enkundleni zokuxhumana, ebika njalo lokuthi umqeqetshi uBenjani Mwaruwari uzathola isipho esifanayo.
Bonke batshelwe ukuthi bayethatha izipho zabo kuVictor eHarare ngoLwesihlanu.
“IHighlanders iledlabuzane njalo ingakhokhelwa kuhle ingenza kuhle,” nguChivayo lo kumbiko wakhe kuFacebook.
Uncome ukunqoba kweHighlanders phezulu kweDynamos ngeSonto kumdlalo weJairos Jiri Charity Shied, ophele kuyi 1-0.
Uthe lokhu kutshengisa ukuthi iHighlanders iyaphezulu emdlalweni njalo kunengi okuhle okukhangelelwe kuyo kulisizini.
“Ukunqoba kweHighlanders iDynamos 1-0 kutshengisa ukuthi iBosso iyakhwela. Sikhangelele umnyaka omnandi, sizakuba lomncintiswano omkhulu.
“Ngokunqoba lokhu, ngithi amhlophe kakhulu kubukhokheli beHighlanders. Kumele umhlahluli weqembu (curator) uJabulani Nkomo abaphelekezele eHarare bayebona uVictor bathathe izimota ezibhadalelwe ngokugcweleyo.”
Uthe uMwaruwari kumele ayethatha i2026 Ford Everest entshantsha ebiza US$92 000. UMnkandla yena uzathatha iToyota Fortuner 2.8 4×2 GD6 (US$80 500), uDenzil eyakhe entsha azayiphiwa yiToyota Fortuner 2.4 4×2 GD6 ebiza US$72 500. UMadinda uphenduka ekhaya etshayela iToyota Fortuner 2.4 GD6 4×2 (US$72 500).
UChivayo ubuke uMadinda ngosekelo alupha inhlelo zengqubekela phambili ezenziwa nguMongameli uMnangagwa lombono wengqubekela phambili oka-2030.
Uthe njengoba labo abazaphiwa izimota bezabe besuke koBulawayo, kumele munye ngamunye bathole i-US$10 000 ezabe ingeyamafutha ezimota leyezinye indleko zabo.
Lonkosikazi kaNkomo uzaphiwa i-US$10 000.
Usomabhizimusi lo uveze lokuthi uzanikeza iBosso imali engange US$500 000 ayeyithembise kumnyaka odluleyo. Uthe ulethemba lokuthi iqembu lizadlala ngcono njalo lidinge abadlali abazwayo abazanakekelwa kuhle, ukuze balethe imiklomelo.
