admin
FLOYD Mayweather (Jr) anoti anogona kudzoka kuzokwikwidza mutsiva hunge kana paine puromota anokwanisa kumubhadhara mari yakanaka.Kuti Mayweather akwanise kurwira mari svinu, anofanirwa kurwa nevatambi vakaita saGennady “GGG” Golovkin, nekuti hakusisina vane mazita makuru vasara vaangakwikwidze navo sezvo Manny Pacquio akasiya mutambo uyu achipinda mune zvematongerwo enyika.
Mayweather ari kufara kuve puromota wetsiva parizvino, uye haasi kufunga nezvekudzoka kuzorwa nevatambi varipo mazuva ano vanosanganisira Tim Bradley, Danny Garcia, Keith Thurman, Kell Brook naShawn Porter.
“Kana mari yakanaka ndingangodzoka,” akadaro Mayweather achitaura nelatimes.com.
“Vatambi vazhinji vanofanirwa kurwa. Ini handina chekurwira. Handina chekuendera kugym. Chandinonzwa kuda kuita parizvino kusimudzira vamwe vatambi vechidiki chete pamwe nekusimudzira mutambo uyu”.
Mayweather nguva pfupi yadarika aida kurwa naConor McGregor mutambi weUFC mumutambo uyo Mayweather aiona kuti waigona kuunza mari yakawanda zvikuru papay-per-view. Asi, McGregor akasarudza zvekurwa naNate Diaz kuUFC 202 muna Nyamavhuvhu kuT-Mobile Arena kuLas Vegas, Nevada.
Murairidzi waMcGregor, John Kavanagh, akati McGregor aitambiriswa US$7 miriyoni dai akabvuma kurwa mumutambo uyu, imwe yose ichienda kuna Mayweather. Zvinonzi MacGregor achiri kuda nezvemutambo uyu asi anoda kuti mari yavanowana vagovane zvakaenzana. — Boxing News 24
Online Reporter