Online Reporter
Kingstone Mapupu
MUIMBI akamboita mukurumbira munyika muno nemusambo weUrban Grooves makore adarika, Innocent Rusununguko Utsiwegota, anoti haasati apera uye adzoka mudariro zvine mutsindo nenziyo itsva inonzi “Zimbabwean Girl”, iyo akatopedza kukwenenzvera.
Utsiwegota akaita mukurumbira nenziyo dzinosanganisira “In My Dreams” uye “Country Boy”.
Akazove nekambani yekutsikisa mhanzi yainzi Country Boy Records, iyo yakasimudzira vaimbi vechidiki vakawanda.
Muhurukuro panhare ari kuZvishavane, uko ave kushandira, Utsiwegota anoti achirimo muindasitiri yezvemimhanzi.
“Ndichirimo mudariro, munyaya dzekuimba. Handiperi zvekumhanya kunyangwe mabasa achindiwandira. Kuimba uku chipo chinobva kuna Mwari, saka regai tichishandise. Ndinayo nziyo inonzi ‘Zimbabwean Girl,'” anodaro Utsiwegota.
Anoti ane tarisiro yokuti mukupera kwegore achange aburitsa dambarefu idzva richadarika mamwe ose.
“Kudzoka munyaya dzemimhanzi handipo pakuda kurwisana nevamwe vangu, vaimbi vechidiki vari kusimukira, asi kuti kuda kubatsirana nekupanana mazano pane kuvandudza kwandakaita nziyo dzangu kubva kare,” anodaro Utsiwegota.
Anokurudzira vamwe vaimbi kuti vasadzosere kumashure zvipo zvavo munyaya dzemimhanzi nekuda kwemamwe mabasa avanenge vachiita.
“Sevaimbi, tine mamwe mabasa atinoita, asi ndinokurudzira kuti tisazosvika pakuuraya zvipo zvedu zvekuimba tava kuwandira kune mamwe mabasa aya, ngatizvifambisei zvose,” anodaro Utsiwegota.
