adminDaphne Machiri
KOREJI yeHarare Polytechnic yava kugadzira mafuta anobatsira vanhu vanorarama nehusope ayo anotanda zuva achiita kuti ganda ravo risakanganisike.Chirongwa ichi chiri kuitwa nechikamu cheScience Technology Pharmaceutical Department uye izano remudzidzisi wepo, VaRanganai Makasi.
Vanoti pfungwa iyi yakauya gore ra2009 apo vaishandira bazi rezveutano kuchipatara cheGweru General Hospital uko vaiva pharmacist.
VaMakasi vanoti panguva iyi ndipo pavakaona matambudziko ekushaikwa kwemafuta anozorwa nevanhu vanorarama nehusope.
“Gore ra2010, ndakazoenda kuRock Foundation Pharmacy ndikaona dambudziko irori zvakare, kuti mafuta emasope anonetsa kuwana uye anodhura sezvo achibva kunze kwenyika. Pandakauya kuzoita mudzidzisi paHarare Polytechnic, ndakangosvika ndiine pfungwa yekuti vanhu vanorarama muhusope vanoda kubatsirwa,” vanodaro VaMakasi.
Vanoti pari zvino hapasati pave nekambani inogadzira mafuta aya munyika muno.
“Ndiri kushanda nemumwe wevandinodzidzisa anonzi George Tumbura uye tine nzira (formula) yatiri kushandisa kubika mafuta aya. Mafuta aya anoita kuti ganda risakanganiswe nezuva, vanhu vasaita maronda uye kuti risaunyana. Vamwe vechidiki vane makore kana 15 okuberekwa vanove masope, nekuda kwekushaya mafuta anoenderana neganda ravo, vanopedzisira voita kunge vanhu vave nemakore anosvika 40 nekuda kweganda rinenge raunyana. Izvi zvinokonzerwa neinonzi Ultra Violet Radiation kunove kupisa kwezuva.” VaMakasi vanoti pari zvino vari mubishi kugadzirisa magwaro ekuti mafuta aya ange achiongororwa nesangano reMedicines Control Authority of Zimbabwe (MCAZ) kuitira kuti kana zvaonekwa zvakakodzera, azoshandiswa zviri pamutemo.
“Isu seHarare Poly tinogamuchira zvakare avo vanodawo kubatsira mukuvandudza bara ratiri kuita iri.
Online Reporter