admin
Johas Moyo
IZAKHAMIZI zeGokwe zilokhe zikhuza umhlolo ngendaba yendoda okubikwa ukuthi ibisithwalise nzima ezinye izakhamizi ngokuzithathela abafazi bazo esihlutshwe kakhulu yinyoka yaze yabaleka lemzini wayo ngoba yathathela umuntu wezizweni umfazi wakhe.
Isiga lesi senzakale kuviki ephelileyo endaweni eyaziwa ngokuthi kuse-Empress esigabeni seGokwe lapho uMathius Dube owaziwa ngokuthi ngu‘Mzingeli’ okubikwa ukuthi usevuke kathathu elele lenyoka ayehlala eyiphupha nsuku zonke okwenyanga ezintathu ezidlulileyo.
Kubikwa ukuthi uMnu Dube ngomnyaka ophelileyo wathandana lomkaDzikamai Shoriwa wacina esezihlalela laye emapulazini eBandakamwe khonale eGokwe okwenyanga eziyisificamunwe munye okuyikho okwaba yisisusa samashwa la.
UMnu Dube kubikwa waqalisa ephupha elele lenyoka le kodwa kuviki epelileyo lumtshaye lwameqa uvalo evuka ekuseni ebona inyoka le ibaphahlile lomkakhe (umkaShoriwa) embhedeni.
Isehlakalo lesi samenza wabikela omakhelwane ukuthi wathathele enye indoda unkosikazi wayo kungakho lowomuntu nguye osemthwalise nzima ngoba efuna ukumbulala.
Omakhelwane babikele intatheli ukuthi uMnu Dube kasaphathekanga kuhle engqondweni kusukela mhla evuka elele lenyoka le.
Esinye isakhamizi esake sathathelwa unkosikazi waso nguDube esingathandanga ukuqanjwa ngebizo sithe uDube ubesebathwalise nzima.
“UDube sametha ibizo elithi Mzingeli ngoba esesithwalise nzima ngokuzingela omkethu, khathesi indwangu ize yalukhutha ugatsha.
“Khathesi kasazi ukuthi ungaphi uyaduka lelizwe ngenxa yokuganga lanxa abakwabo bezama ukudinga usizo ebantwini ukuze bathole isisombululo sayo,” kutsho isakhamuzi lesi.
“UDube ubezenza inkonjwa kodwa loba kunjalo kuyasidanisa ukuthi khathesi kasaphathekanga kuhle engqondweni ngenxa yezenzo zakhe. Okunye osekusidanisayo yikuthi uzakwelatshwa ngubani njengoba owamthiyayo laye wakhalala wabuyela kibo eZambia,” kulandisa isakhamuzi lesi.
Esinye njalo isakhamuzi esimela usobhuku, uMnumzana Danisa Sibanda sithe uDube uzakuba yisibonelo kwabanye abagangileyo esigabeni.
“Okwenzakale kuDube kuzakuba yisibonelo ebantwini abanengi esigabeni ngoba asibafuni abantu abangaziphathanga, abantu kumele bahloniphe imizi yabanye,” kutsho uMnu Sibanda.
Intatheli yenelise ukukhulumisana lomzukulu kaMnu Dube uMthokozisi Bhebhe obikele uMthunywa ukuthi kuliqiniso ukuba umalumakhe kasaphathekanga kuhle emkhumbulweni.
“Kuliqiniso ukuthi umalume wathatha umkaShoniwa njalo laye wahle wabaleka ngemva kokuvuka kwabo bephahle inyoka.
“Ngilokudana njalo ngizizwa ngilenhloni emehlweni abantu ngesenzo sikamalume. Ubekuthanda ukuthathela abantu amakhosikazi abo kodwa khathesi ufike komlindi uyacina mpela. Kunyanga ezimbili ezidlulileyo uShoriwa wafika ekhaya ezocela unkosikazi wakhe kodwa umalume wathembisa ukumtshaya angaphinda alugxobe emzini wakhe.
“Ngemva kwamaviki amabili waqalisa ukuphupha inyoka leyo eyiyo ecine imbalekisa ekhaya kodwa ubengasaphathekanga kuhle engqondweni.
“Khathesi ukoMathambo lapho elatshwa khona kodwa asikezwa inguquko ngesimo sakhe,” kuphetha uMnu Bhebhe.
Online Reporter