admin
YiNtatheli kaMthunywa
UKUNQOBA kweHighlanders phezulu kweDynamos sekukhukhumeze umqeqetshi uBongani Mafu, okuyikhona okuzagcina umsebenzi wakhe eqenjini.
UMafu usebike ukuthi ulethemba elikhulu kubafana bakhe beBosso ngakho abalandeli beqembu leli bangakhathazeki kulisizini, ngoba ulakho ukuhluthuna inkezo zonke, ngaphandle kweyePremier Soccer League.
Umqeqetshi lo ukhulume kanje ngemva kokunqoba iqembu leDynamos kunkezo yamabutho eyeZNA Charities ngeSonto edluleyo.
UMafu uthe uyaziqhenya ngabafana bakhe abanqobe iDynamos.
“Ngilesifiso sokuthi senze kuhle kulisizini. Sisebenze nzima, yebo sike sadliwa, senza utshiki lobhanqa lamanye amaqembu, sokuyisikhathi sokuthi lathi sizimisele.
“Ukunqoba i-Dynamos kusenza lathi sibelentshukuntshu yokuthi sisebenze gadalala nanko phela ukunqoba kuvele kumnandi, futhi kuyabajabulisa abafana bethu,” kutsho uMafu.
UMafu uthe iloba iqembu lakhe libe lamathuba amanengi, elehluleke ukuwasebenzisa, kakutsho ukuthi abafana bakhe kabalazi ibhola.
“Ungabona abafana besenelisa ukuthi benze amathuba, angabenza babelakho ukuthi bahlohle, kutshengisa ukuthi bayayazi into abayenzayo. Ungeke wabalamathuba ungazange ubonakale ugijima. Mina njengomqeqetshi ngikubona njengento eqondileyo kakhulu, njalo kukhomba ukuthi abafana balakho ukwenza kuhle kweminye imidlalo,” kutsho uMafu.
Online Reporter