admin
Cornelius Luphahla
IZAKHAMIZI zesigabeni seLupane ziphakathi komhlane lembeleko nanko phela sezithole uncedo lokwakhelwa amakilasi yinhlanganiso ezimeleyo ebizwa ngokuthi yiAfrica Project ngenhloso yokuthuthukisa ezemfundo esigabeni lesi.
Ngaphandle kokwakha amakilasi, inhlanganiso le iphathisa njalo abafundi abalabazali abaswelayo abaleziphiwo kwezemfundo ngokubabhadalela imali zesikolo.
Inhlanganiso le ekhokhelwa nguDokotela Hans Joseph Schales ongudokotela esibhedlela seSt Luke’s kubikwa isiphathise izikolo ezingu-18.
UMgcinisihlalo walinhlanganiso uMnumzana Gordon Hlatshwayo ubikele intatheli ukuthi inhlanganiso le yaqala ukuphathisa izikolo zendaweni le ngomnyaka ka2001.
“Inhlanganiso le yafika kuleli ngo2001 njalo isiyakhele izikolo izakhiwo ezitshiyeneyo ezifana lamakilasi, izindlu zababalisi zokuhlala kanye lezabafundi abahlala khatshana lesikolo.
“Incedisa njalo abantwana besikolo ikakhulu abaswelayo ngokubabhadalela imali zesikolo kanye lokubapha amayunifomu, ngenjongo yokuthuthukisa imfundo kule indawo,” kuveza uMnu Hlatshwayo.
Uqhubeke njalo wachaza ukuthi inhlanganiso le incedisa izikolo ikakhulu eziseduzane lesibhedlela se St Luke’s.
“Inhlanganiso le inceda izikolo ikakhulu eziseduzane lesibhedlela seSt Luke’s ngesizatho sokunqabela ukuhamba umango omude kuyiwa kulezozikolo. Khathesi izikolo esizincedisayo zingu-18 kodwa ezinhlanu zisanda kungena kuloluluhlu.
“Khathesi sakha amakilasi ezikolo ezigoqela iSibangani, Mlonyeni, Amandlethu, Malumba kanye leGandangula kuthi eMafa kuvuselelwa amakilasi. EDaluka, Ulutho leTshayamathole sakha izindlu zababalisi kuthi eRegina Mundi sakha izindlu zabantwana besikolo, eZwangendaba safaka impompi zetanka yamanzi,” kulandisa uMnu Hlatshwayo.
UMthunywa uzwe njalo ukuthi inhlanganiso le iyancedisa isibhedlela seSt Luke’s ngokusakhela izakhiwo ezifunekayo, ukungezelela izisebenzi zesibhedlela, imali kanye lokuthenga imithi lamaphilisi afunekayo.
Online Reporter