admin
Listen Ndlovu
UMLIMI ofisa ukulima i-broccoli engazitshayela imali enhle nxa engaqala ukuyilima khathesi.
Lokhu kukhulunywe ngomunye umlimi omkhulu olima eseRangemore, uNkosazana Nobuhle Mlotshwa.
Uthe i-broccoli yenza kuhle kakhulu futhi inika umlimi imali enhle emkambo ingaqala ukulinywa khathesi.
“I-broccoli ikhula kuhle endaweni elelanga elinengi ngakho umlimi kumele aqinisekise ukuthi indawo yakhe alima kuyo ilelanga elifaneleyo ukuze isilimo sikhule kuhle,” kuchaza uNkszn Mlotshwa.
Uqhubeke esithi, “Umlimi kumele alungise umhlabathi wakhe azalima kuwo njalo aqinisekise ukuthi yindawo egcina amanzi.
“Kuqakathekile ukuba umlimi ananzelele ubumunyu bomhlabathi wakhe ngoba kumele bube buphakathi kwe- 6,0 le 7,0 ukuze isilimo lesi sikhule kuhle.
“Ukuze kube lesivuno esihle umlimi kumele afake umquba uhlale emhlabathini amaviki amabili engakalimi. Kuqakathekile ukuthi umlimi alime endaweni elokudla okunengi ukuze isilimo sikhule kuhle. Amagodi lapho okufakwa khona inhlanyelo kumele abe eyi-1cm ukutshona abesetshiyana nge-5cm emzileni,” kuchaza uNkosazana Nobuhle.
“Umlimi kumele ahlanganise ifethalayiza ele-nitrogen kanye le-phosphorus le potassium ngoba kuletha ukudla okutshiyeneyo esilinyweni.
“I-nitrogen ikhulisa kakhulu amahlamvu kukanti i-potassium le-phosphorus ikhulisa kuhle ijodo okuyilo elivunwa ngumlimi yingakho kuqakathekile ukuthi inhlabathi ibe lokudla okwaneleyo okutshiyeneyo ukuze isilimo sikhule kuhle okuzenza isivuno sibe sikhulu,” kuchaza uNkszn Mlotshwa.
“Umlimi kumele ahlale ehlakulela isilimo sakhe ukuze kungabi lokhula njalo lokhu kwehlisa ukutshisa komhlabathi.
“Okunye umlimi okumele akunanzelele isilimo sakhe nxa sihlaselwa yizibungu ezinjengentwala ezibangela ukuthi amahlamvu aphenduke umbala ube lithanga.
“Izibungu lezi engazikhipha ngokufafaza amanzi lapho okulezibungu ukuze isilimo sikhule kuhle. Ananzelele njalo izibungu okuthiwa ngama-cabbage loopers ngoba lazo ziyadla amahlamvu esilimo okucina kudala ukuthi isilimo singakhuli ngendlela efaneleyo,” kuphetha uNkszn Mlotshwa.
Online Reporter