admin
ILOKHE isegudwini indaba yomdlali wekhililithi wakuleli uBrandon Taylor yokusebenzisa isidakamizwa se-cocaine lokuvuma ukuphiwa imali yokuthi athengise imidlalo.
Loba sekudlule amaviki athile lumdlali ebike ukuthi ngempela wakwenza lokhu, abezemidlalo balokhe becunukile ngesenzo sakhe.
Bayabuza abathandi bezemidlalo ukuthi pho uTaylor wathengisa imidlalo emingaki eminyakeni engu-17 edlalela ama-Chevrons.
UTaylor, oke waphatha isikhundla sokuba ngukaputeni wama-Chevrons, waveza ukuthi kumidlalo ethile kusukela ngo-2019 wayedibana “lamagwelegwele” angosomabhizimusi abamfuqa ukuthi ahambe phambili ngokuthengisa imidlalo athole imali engange $15 000 aphinde athole enye i$20 000 yaseMelika.
Umdlali lo, oleminyaka engu-35 yokuzalwa, wadlalela ama-Chevrons kumidlalo engu-34 yama-Tests, engu-205 yama-One Day International lengu-45 eyama- T20.
Ngenxa yokutshaywa ngumzwangedwa, uTaylor wazisa ilizwe ukuthi impilo yakhe isengozini ngoba “imigulukudu” ye-India ingamhlasela. Umdlali lo waceba lakunhlanganiso ye-International Cricket Council.
“Sanatha amanamunede banginikeza i-cocaine,” kutsho umdlali lo.
Wabika ukuba ngelanga elalandelayo, osomabhizimusi laba bamlanda bamtshengisa ividiyo bemethusela ukuthi engekela ukwenza abakufunayo bazayithumela emphakathini.
Inhlanganiso ye-ICC imnike isijeziso sokuthi engadlali ikhilikithi kumbe ukuphatheka kuyo okweminyaka emithathu elengxenye.
Kusenjalo, iphephandaba likazulu likhulumisane lezazi zomdlalo wekhilikithi labadlali abasacathula ababike ukuba isenzo sika-Taylor bekumele sibe lesijeziso esikhulu.
UNorman Dliwayo, ongumqeqetshi wekhilikithi kwelinye ikolitshi koBulawayo uthe uTaylor kumele abengumzekeliso.
“Udaba lolu selusivule amehlo ngendlela abadlali bethu abaziphatha ngayo njalo lokuthi bahlala bekusimo sokulingwa.
Esikucelayo kunkokheli zomdlalo wethu yikuthi baxwayise abadlali, baphinde bajezise okuzwayo labo abaphambanisa kanje. Lokhu kuzakuba ngumzekeliso kwabasakhulayo,” nguDliwayo lo.
Omunye wabadlali, oseke wadlalela iqembu le-Tuskers uthe lakhathesi usadanile ngokuzwa ngoTaylor.
“Njengoba sihlezi silandela abadlali abakhethwa kuqembu lesizwe, uTaylor ubengomunye ebengimhlonipha, kodwa kuthe sekuvela lokhu akukhulumayo, ngezwa ngiyangeka.
“Umdlalo lo unzima njalo usugcwele abantu abathanda imali.”
Isehlakalo esehlela uTaylor, esokuphiwa imali yokuthengisa imidlalo, sehlela futhi loHeath Streak, owabayintandokazi edlalela ilizwe lalapho esengumqeqetshi.
Online Reporter