Online Reporter
Mbulelo Mpofu
ABAHLABELELI bakoBulawayo babona ikusasa leqembu lentsha yakoBulawayo elithiwa yiBulawayo Children’s Choir livulekile ngemva kokubambisana kungoma yabo entsha ethi, Igama lakho ngubani?
Lingoma ilevidiyo kuYouTube isibukelwe ngabantu abadlula amakhulu ayisikhombisa kusukela ngoMvulo. Lingoma ikhuluma ngokuqakatheka kwamabizo esintu, okuyiwo ayeveza njalo akhe isimilo somuntu.
Bekhuluma lentatheli kaMthunywa, abahlabeleli ababalisa uMzoe7, uThandy Dhlana, lembongi uThaluso Da Poet, bababaze ngokusebenza lentsha.
“Yazi ukukhuluma iqiniso, estudiyo bekulula ngoba umpheki wengoma kazange abe lemingcele ukuthi bhala ngalokhu, khuluma ngalokhu, wangichasisela ingoma ngasengihamba estudiyo. Lokhu bekulula.
“Sikholisile ngesikhathi sipheka ividiyo loba sasitshaywa luvalo. UMoyoxide kunye lomqondisi weCommunity Messengers babekhona ukusincedisa,” kutsho uThaluso Da Poet.
Iqembu leBulawayo Children’s Choir elasungulwa nyakenye ngoMpalakazi laqala ngengoma ethi Banolila (Mother Nature is Crying).
Libunjwa ngabantwana abavela ezikolo ezibalisela iCharleston Trust Primary School, Petra High School, Dominican Convent Primary School, kanye leHillside Primary School.
Abanye abakulingoma babalisela uThandy Dhlana uButholezwe loNovuyo Seagirl.
Umqondisi weqembu, uTrevor Mawaka uthe lingoma kwakuqakathekile ukuthi ilotshwe ukwenzela ukuthi ifundise intsha indlela zendulo.
“Kwakuqakathekile ukuthi senze lingoma ngoba singakhangela kudala kwethu, igama lomuntu laliqakathekiswa kakhulu njalo lalikuveza ukuthi umuntu lo ngumuntu onjani. Yingakho sayipheka ngenhloso yokufundisa intsha ukuqakatheka kokwetha amabizo alomutsho,” kutsho uMawaka.
Kumhlabeleli, uMzoe7, iBulawayo Children’s Choir yikusasa yomculo wakoBulawayo.
“Ngijabule kakhulu ukubana ngisebenze lentsha okuyiyo ikusasa yezomculo iBulawayo Children’s Choir ikhokhelwa nguTrevor Mawaka. Kuyajabulisa ukuba intsha layo ibe lamaphupho afezeka isasungula. Leliqembu lilesipho njalo ngabantwana abazothileyo abalenhlonipho, ngiyaziqhenya kakhulu ngokuthola ithuba lokusebenzisana labo.”
UThandy Dhlana uthe: “Kwakubusisa ukusebenza labantwana estudiyo. Basitshengisa uthando olukhulu, kwasebenzeka lula labo.” UMawaka uthembise uzulu ukuba leliqembu lizaqhubeka lisenza ingoma ezifundisa abantwana ukuziphatha kuhle, ikakhulu kukhangelwe udaba lwezidakamizwa eseziqede intsha elizweni.
