Online Reporter
Ethel Ncube
I-CAULIFLOWER ngesinye sezilimo esenza kuhle nxa singalinywa ngesikhathi somqando kungakho abalimi bakhuthazwa ukuba bayilime.
UNkosazana Samantha Moyo okhangela ngezeHorticulture ubike ukuba i-cauliflower yenza kuhle okumangalisayo ngesikhathi somqando.
Uthe abalimi bangazilimela isilimo lesi ngesikhathi lesi ngeke bazisole.
Ekhuluma lentatheli uNkszn Moyo ubike ukuba imibheda yokuhlanyela kumele ilungiswe kuhle andubana umlimi alime i-cauliflower yakhe.
“Ukuze usaba lwe-cauliflower lumile kuthatha amaviki amathathu kumbe amane. Imibheda kumele ibe yi-1,5 metres ubude.
“Idinga ukuthelelwa okuzwayo isesencane. Nxa sihlanyelwe idinga ukwehlukaniswa nge-40cm kusiya ku-50cm ngoba kayifuni kuminyaniswa.
“Nxa usuhlanyela, amagodi kumele abe etshona kufike ku-30 kusiya ku-40cm,” kutsho uNkszn Moyo.
Uqhubekele phambili eveza ukuba nxa suhlanyele i-cauliflower idinga ukunakekelwa kuhle.
“I-cauliflower idinga ukunakekelwa ngasosonke isikhathi ukuze ingahlaselwa yimikhuhlane. Kumele ubone ukuba amahlamvu embesiwe phansi ukuze ingahlaselwa yimikhuhlane.
“Ukuze ivuthwe ithatha inyanga ezintathu kusiya kweziyisithupha kusiya ngokuthi inhlanyelo oyifakileyo ngevuthwa masinyane yini,” kuphetha uNkszn Moyo.
