Online Reporter
Ethel Ncube
INHLANGANISO yeLivestock Production isixwayise abalimi abagcina inkomo zochago ukuthi benze i-cross breeding ukuze izifuyo zabo ziqine.
UMnumzana Cosmas Muzunde onguLivestock Officer esabelweni seMatabeleland North ukhuthaze abalimi abagcina inkomo zochago ukuthi benze i-breeding.
Uthe ukhuthaza abalimi ukuthi babe lochago olungenela uzulu wonke ukwenzela ukuthi singabi sikhipha imali sithenga uchago kwamanye amazwe bona belenkomo zochago. Uthe kulemihlobo eminengi etshiyeneyo yenkomo zochago.
“Silemihlobo etshiyeneyo yenkomo egoqela ama-Jersey, Holstein, Ayrshire, Guernsey, Red Dane, Simmental kanye lama-cross breeds. Ukuze umlimi athole inzuzo kubhizimisi yochago, umlimi kumele abone ukuthi inkomo zonke ziyazala ukuze zehlise,” kutsho uMnu Muzunde.
Uqhubekele phambili esithi nxa abalimi besenza i-breeding kumele behlole ukuthi inkomokazi zabo ziyazala.
“Sikhuthaza abalimi ukuthi bahlole inkomo zabo ukuthi ziyazala na, njalo bahlole lenkunzi abazayisebenzisa ngokunjalo,” kutsho uMnu Muzunde.
Uthe kukhona okuthile okulomthelela ekuzaleni kwenkomo. Kumele abalimi bakhangele okuthize okufana lempilakahle yenkomo, i-heat detection, isikhathi sokuzisebenzisa, uhlonzi lobudoda benkunzi,” kanye leminyaka.
“Kuqakathekile ukuthi umlimi abekwazi isikhathi esiqondileyo soku-breeder njalo umlimi engaphambanisa isikhathi kuyaphambanisa isimo zokuzala enkomeni zakhe.
“Uhlonzi lobudoda benkunzi lakho kungaba lomthelela ekuzaleni kwenkomo zomlimi kungakho-ke kuqakathekile ukuthi umlimi ahlole inkunzi esesibayeni sakhe.
“Iminyaka yenkomo layo ilomthelela omkhulu lapha ngoba akumelanga basebenzise inkomo esindala nxa befuna ukwenza i-breeding,” kuphetha uMnu Muzunde.
