Online Reporter
Bekubekwe ilanga lamhlaka 27 Mpalakazi okungasensuku ngaki ukuthi siwugqibe. Besithabe simanzi te, njengezihlobo labangane sisithi sizagida ngeKhisimusi mhlaka 25 kuthi mhlaka 26 sitshone sikhokha umoya silungiselela ilanga elikhulu elikamhlaka 27.
Umzawami lo okade kumele atshade ubeselungiselele okusezingeni eliphezulu njalo lendawo lapho akade ezatshadela khona edolobheni bekuzakuthi kuqedwa lapho kubhekiswe amabombo ekhaya lapho azalwa khona silale sigida kudliwa lezibiliboco.
Njengomuntu oselizweni laseMelika esebenza ebhanga lomhlaba, imali uyihola ngengowane, khona nxa eseyitshintshela kweyakithi lapha ekhaya iba ngamaqubaquba.
Waphangisa ukusuka eMelika esenzela ukudlula elizweni laseNingizimu Africa ethatha isithandwa sakhe besiza ekhaya ngendizamtshina. Sasizabahlangabeza egcekeni lendizamtshina leJoshua Mqabuko Airport, koBulawayo.
Phela laba bantu babekhombisane kubhuku lobuso iFacebook, kwenziwa konke ngomakhalekhukhwini ledombo lalo lalisebenzisa yena umakhalekhukhwini ukuhambisa imbiko koyisezala kamzawami walotsholwa ekhonale eGoli, indoda iseMelika.
Kumakhalekhukhwini untombazana kamzawami wayefake impikitsha yakhe esesemncane emuhle njalo engakehlelwa yingozi yemota eyamtshiya esephila lobugoga.
Intombazana le kayizange itshele umzawami ngesimo lesi, mhlawumbe ekwazi ukuthi angavela awuthi vu iyabe isiwucithile umuthi inkonyane.
Uthe efika umzawami eGoli wayengatshelanga isithandwa sakhe ukuthi uzafika mhlaka bani ethi ufuna ukufika elibele okubizwa ngolimi lwabondlebe zikhanyilanga ngokuthi yi-surprise kanti kabuzanga elangeni, nguye owacina eselesithuli engazi lokuthi angayibika athini ngoba ezisola kakhulu ngobuphukuphuku bakhe bokuqeda yonke into emayelana lomtshado wakhe ngomakhalekhukhwini.
Uthe ethi gaga, mehlo suka wathithibala okomuntu ozwe imfa yomzali wakhe waqanda okwelitshe elilele emanzini. Waqunga isibindi wathi ubengazi ukuthi wayenjalo yingakho yena usesedlula lakanye kulapho esathi sivuka sisizwa ukuthi ubuyile sawalola ngamandla amazinyo kanti asibuzanga elangeni, umndeni wonke wabuthelelwa kwatshelwa-ke abantu ukuthi umtshado awusekuba khona ngoba umalukazana kazange abeleqiniso kusukela ekuqaleni.
Abanye basebecabangela ukuthi mhlawumbe ubanjwe lendoda kanti cha minengi imitshado enjalo, abanye bacine behlalela ukuthi bangathini ngoba kwesinye isikhathi kuyabe kungasabuyeleki emuva.
Kuqakathekile ukuphumela egcekeni liqala uthando lwenu ukuze konke kube sobala.
Ayixabene.
