Online Reporter
Ethel Ncube
KULAMADODA amabili eMberengwa esigabeni seShayamabvudzi ngaphansi kwenduna uBvute abayizelamani abasolwa ngokubulala umuntu qede badla phansi.
UPatrick loPerfect Dhibhi abangumuntu lomfowabo kubikwa baxabana lo-Anele Moyo bacina sebesilwa ngokucwayiza kweso bakhupha ingqamu bagwaza uAnele bamtshiya ethe daca phansi, ngeSonto edlulileyo.
Kubikwa ukuba uPerfect waba lokungazwisisani loAnele kodwa ngesizatho esingaziwayo. UPatrick ebona umfowabo esilwa laye wacina engenela, bamthelela bacina bemkhulela bamgwaza umzimba wonke okwadala ukuba uAnele asale elele phansi.
UMoyo wagijinyiselwa esibhedlela seMberengwa ukuba ayethola usizo, ngokuswelakala kwenhlanhla wathi efika esibhedlela bememukela kwathiwa usedlule emhlabeni.
Abetheswacala lokhu bengakabonakali.
Intatheli ixhumane lobambele isikhulumi samapholisa eMidlandls uAssistant Inspector Xolani Dube obike ukuba ababili laba bayadingwa,
“Indaba yokufa kukaAnele Moyo silayo sisaphenyisisa ngayo. Sicela uzulu ongabe elemininingwane emayelana lalapho esingathola khona uPatrick loPerfect Dhibhi azise amapholisa aseduzane laye,” kubika uAss Insp Dube
