admin
Cornelius Luphahla
UHLANGOTHI lwenkampani ye-Econet iEcosure solusungule uhlelo lokuthuthukisa ama-burial societies asebenzelana layo ngokuwancedisa ngezinye indingeko ezifuneka nxa bethe balahlekelwa ngamalunga abo.
Umanyano wama-burial societies kanye le-Ecosure kubikwa uqale ngenyanga kaMpalakazi ngomnyaka ka2014 ngenhloso yokuncedisa izizalwane zakuleli ezikumakilabhu ezimfa ngokubapha amabhodo, imiganu, amankomitsho kanye lemali.
UMthunywa ukhulumisane loMnumzana Victor Jele onguMgcinisihlalo we-Enkanyisweni Burial Society ePumula South wathi ulokujabula okukhulu ngoncedo abaluphiwe yi-Ecosure.
“Mina ngiyajabula kakhulu ngoba i-Ecosure isincedile kakhulu ngoba isiphe imbiza enkulu, ibhimu, imiganu engu-100 kanye lezinye impahla ezidingakala nxa kuphekwa.
“Lokhu sokusithuthukisile ngoba ikilabhu yethu ibisihlehlela emuva ngenxa yokuswela impahla zokuncedisa kanye lemali.
“Lingedlula i-200 liyaphiwa imbiza enkulu, ibhodo, imiganu engu-200 lamankomitsho,” kutsho uMnu Jele.
UMnu Jele uqhubekele phambili waveza ukuthi okuhle nge-Ecosure yikuthi lingabhalisa libanengi kukilabhu yenu iyalipha izipho ezinengi.
UGeneral Manager wale inhlanganiso uMnumzana Godwin Mashiri ubikele intatheli ukuthi ukuze uthole usizo lolu ku-Ecosure ungena usebenzisa i-EcoCash njalo akukhathalekile ukuthi libangaki.
“Ukuze ungene ku Ecosure kudingeka ukuba ube kuEcocash andubana uzikhethele imali ofuna ukuyikhipha ngenyanga.
“Imali le ithatha ilanga elilodwa ukuze iphume nxa uthe wabika ukuthi subhujelwe.
Ekuthathweni kwayo ithathwa ku-Ecocash lakwamanye ama-funeral palour agoqela iDoves, Kings and Queens kanye lakoFalakhe ngemva kokuba uhambise i-burial order, abafakazi kanye lephepha elibika ukuba kumele uphiwe imali enganani,” kuphetha uMnu Mashiri.
Online Reporter