admin
Buhlebenkosi Gaule
KULENINA leGwanda elimiswe phambi komthethwandaba weGwanda lisetheswa icala lokubhuqa elinye inina lalikhumula amazinyo kubangwa indoda.
Umsolwa uLethiwe Ndlovu oleminyaka yokuzalwa engu-30 umiswe emthethwandaba lo kuviki ephelileyo esetheswa icala lokutshaya uNkosazana Shupikai Mayhengere oleminyaka yokuzalwa engu-34.
Kubikwa mhlaka 19 Mbimbitho kuwonalo umnyaka uNdlovu walanda uNkszn Mayhengere emzini wakhe ePhakama lapho afika ekhwaza esithi kungani emehlukanisa lomkakhe.
Kubikwa uNdlovu waphinda wethesa umamangala icala lokuhlala lomkakhe amalanga amathathu.
Idale lizwe ukuba uNdlovu wasebenzisa ukhuni ukutshaya umamangala entanyeni, ezandleni lasemhlane njalo ngaleso sikhathi kwathutsha uMnumzana Mark Moyo ezobalamula.
Kubikwa ukuthi ngesikhathi uMnu Moyo ezama ukubalamula ababili laba uNkszn Mayhengere wabaleka wayangena endlini kodwa uNdlovu wamlandela lapho afika khona wadobha imbiza wamtshaya ngayo waze wakhumuka amazinyo.
Idale lizwe njalo ukuba uNkszn Mayhengere wenelisa ukubaleka lapho uNdlovu wasala ebulala impahla ezazisendlini okugoqela iwayilesi lomabonakude.
Umtshutshisi kulelicala uMnumzana Moses Godongwe utshele inkundla ukuba uNdlovu kumele athole isijeziso esizaba yisibonelo kuzulu ngoba akulunganga ukuthi lanxa umuntu ephambanisile atshaywe alahlekelwe yimpahla yakhe.
Umantshi uMnumzana Araphat Konzani unike uNdlovu isijeziso sokuthi ayepika inyanga eziyisificamunwe munye ejele kumbe abhadale imali engange $40. UNdlovu kumele abhadale imali zesibhedlela ezasetshenziswa nguNkszn Mayhengere.
Online Reporter