Online Reporter
Brandon Moyo
ABADLALI belizwe kumdlalo we-golf behluleke ukufinyelela kumncintiswano wenkezo yomhlaba kuToyota Junior Golf ngemva kokunqotshwa ku-All Africa Junior Team Championships Tunisia.
Kuhlandla lamankazana, iZimbabwe iqede ikunombolo yesine, ebafaneni kweyesithathu. Kulumncintiswano bekudingwa intshantshu leqembu lesibili ukuthi bathole indawo yokuya kuWorld Cup, ezaqhutshwa eJapan lonyaka.
Kunqobe iSouth Africa, kwalandela iMorocco kuhlandla labafana. Kumidlalo yamankazana intshantshu kube yiMorocco, kwathi iSouth Africa yaba ngeyesibili. Abafana beSouth Africa sebenqobe okwesi-18 kulelibanga lomncintiswano. Amankazana akuleli lizwe abeqala ukunqotshwa kusukela ngo-2017.
Iqembu lakuleli elabafana ligoqela abadlali uTanaka Chatora, Thomas Sinclair, Tawana Mangoma loBrydon Amm, abaqede belomiklomelo engu-694, belandela iSouth Africa ebatshiye nge-37 shots, iMorocco ibatshiye nge-32 shots.
Ngenhlandla lakuqala kumidlalo yabafana, iZimbabwe ithole 228 (72,76 le80). Kuhlandla lesibili ibe le-229 (75, 77, 77). Kuhlandla lesithathu ibe le-237 (73,82 le82).
Amankazana athole 168 (82, 86) shots kuhlandla lakuqala, yalandela nge-154 (75, 79) shots. Kuhlandla lokucina ithole- 155 (73, 82) shots.
Loba iZimbabwe yehluleke ukuya kunkezo yomhlaba, kubeyinjabulo umdlali wayo uMiriam Masiya eqede ekunombolo yesibili ku-individual leaderboard.
UMasiya uleminyaka engu-15 yokuzalwa. Umdlali lo usalele emuva nge-two strokes kumdlali weMorocco uSawssane Melhli. UMasiya ubele 14-over-par-230. UMelhli ubele 12-over-par-228.
UChatora ubekunombolo yetshumi ku-leaderboard kuqula labafana, ethole 13-over-par-229. Obephambili nguJohannes De Bruin oweSouth Africa (2-over-par-218).
