Online Reporter
Ethel Ncube
IYUNIVESITHI yeLupane State University yenza izimanga nanko isilungisa ukudla okuthandwa ngabanengi kwalezinsuku kodwa kusenziwa ngokudla okutshiyeneyo kwesiNtu.
Isizatho sokwenza lokhu kuyikuvikela abantu emikhuhlaneni ngemva kokuba kutholakale ukuthi ukudla kwesiNtu kuyavikela emikhuhlaneni.
Okunye kokudla osekulungiswa yi-yunivesithi le kugoqela ama-noodles enziwe ngamabele, amacimbi, awenyawuthi kanye lama-multi-grain noodles.
Babuye balungise njalo imputshana yokujiyisa umsobho nxa uphekwa (soups) enziwe ngomkhomo.
Ekhuluma lomunye umbalisi weLupane State University uMnumzana Makhosi Mahlangu uthe ukudla kwesiNtu kuyavikela abantu emikhuhlaneni.
“Ukudla esikudlayo, amafutha, umumbu yikho okwenza sibe lemikhuhlane etshiyeneyo esenza sicine sigula. Ngesizatho lesi, iyunivesithi yeLupane isisenza ukudla okuthandwa ngabanengi kulezi insuku kodwa isebenzisa ukudla kwesiNtu kuphela.
“Ukudla okwenziwayo kugoqela ama-noodles enziwe ngamacimbi, imputshana yokupheka umsobho (soups).
“Silezitshebo ezingadingi ukuxhwathiswa, ezidinga nje ukuthi uthele amanzi atshisayo ngesikhatshana sutsheba.
Izitshebo zakhona zigoqela i-instant ulude, instant ibhobola, le-instant idelele.
“Ekudleni lokhu asifaki ezinye izinto ngoba yikho okubangela imikhuhlane, kwenziwa ngezinto zesiNtu zodwa,” kubika uMnu Mahlangu.
Ubuye waveza ukuba ukudla lokhu kutholakala ngaphi.
“Ukudla lokhu esikubukisa lapha kutholakala enyunivesithi yethu eLupane, nxa ukudinga kumele usivakatshele ukuze uthole ukudla okungelamkhuhlane, okulempilo.”
Uphethe ngokukhuthaza uzulu ukuthi impilakahle yabo isezandleni zabo ngokudla abakhetha ukukufaka emiganwini yabo.
“Asibuyeleni ekudleni kwethu kwesiNtu sibe lempilakahle engcono ngoba akula mikhuhlane eminengi,” kuphetha uMnu Mahlangu.
