Online Reporter
Ugwalo: Emfuleni wezinyembezi olwalotshwa ngu Ezekiel S K Hleza
Ophezulu Stinta
Siqhuba ugwalo lwethu oselulanda emaphethelweni, silokhu siphezu kwendaba kaZibuse, kuyaliwa, kulwelwa umhlabathi kanye loZibuse. Ngempela ludaba olunzima okwamagama lolu, kakho ofuna ukuvuma kumbe ukwamukela umbuso womunye, wonke umuntu ufuna kube ngolwakhe uhlobo olubusayo, ngempela ludaba oluxazululwa ngumdali onguye owadala izulu lomhlaba.
Sitshiye umlungu uMackean, ongomunye wabatshayela indizamtshina, esebambe owangaphansi ukuthi kanti izinto sezihambe zajika, kutheni sejikelwa langomunye wakhe abetshayela laye indizamtshina, owayesethe guqu guqu wavele watshintsha ulimi kwaguquka lenkulumo.
Kwasekudingeka njalo umdlalo wamathambo engqondo njengoba iqula lebutho labamhlophe kwasekuzwakele ukuthi lalizadlula ngendlela, babalisa ngelithi babefana lempethu zilanda inyama yazo. Iganga lase Mapate laselisesabeka ngempela, othebula labo behlome bephelele ngemihlobo yonke yezikhali, labo basebesezingeni eliphezulu, belezikhali ezixotshanisa indizamtshina zize ziyiwisele phansi.
Amadoda la ayevele ethwele ifulegi yabo okusobala ukuthi basebezovala umngcele wabo, akekho owayezabuya adlule kumbe alubhade lapho ayabe esevale khona. Lolu ke kwasekuluphawu lokuthi intambo sezibanjwe yibo kulolo hlangothi olukhethelekileyo. Kwakhiwa amatende ayisigombolozi esinzima okokuthi kwakungelula kumuntu kazana nje ukuthi aze ayofika phakathi enzikini.
Kwakubiywe ngemihlobo yonke yezikhali, kubiywe kwanxitshwa. Babelesiqiniseko sokuthi akulandizamtshina eyayingena phakathi kwenkundla iphumelele, amadoda ayegqize ephelele ngamasongo egazi. Kulapho ababona kungcono ukuthi bafihle khona uMackean lo ababemthumbile, kunengi okwakusadingeka kuye, ngakho kwakubalulekile ukuthi bamgcine okwesikhathi baze basuthiseke ngento yonke ababeyifuna kuye.
Ukuthunjwa komuntu weqembu eliphikisayo yinotho enkulu kolunye uhlangothi ngoba uyabe zatshiswa ngendlela ethi kumele akhulume konke akwaziyo ngabakibo kanye, aphendule lalokho okudingwa yisitha. Yingakho nje uSpinoza wayekhala kakhulu ngokuthi uMgandane kwakungamelanga ayefika ezandleni zamabhunu, kwakungcono lokuthi ahlakaze indizamtshina eyayimthwele kuhle kuchitheke igula lamasi.
Abanikazi bomthunjwa labo bayabe bevele behelelwa bedliwa ngumhede hede ukuthi omunye wabo uzavula isifuba afike ngaphi pho, lalapho besizwa umdumo othile bayabe besithi inkonyane sichithe igula lamasi.
