admin
Listen Ndlovu
UMLIMI ofisa ukwenza imali angazilimela i-green pepper ngoba ilebhizimusi enhle njalo ilinywa umnyaka wonke.
UNkosazana Nellie Banda ongumlimi eBurnside koBulawayo ubike ukuba i-green pepper yisilimo esikhula kuhle endaweni elelanga elinengi njalo emhlabathini omanzi.
“Nxa umlimi elungiselela ukulima ama-green pepper kumele alungise umhlabathi wakhe awuhlanganise lomquba kumbe lefethalayiza esebenzisa ifologwe yesivandeni,” kutsho uNkszn Banda.
Uthe okunye okudingwa yi-green pepper yikuthi umlimi enze imibundu endaweni alungise khona itshiyane ngemitha lapho azahlanyela khona.
“Amagodi kumele ukutshona kwawo kube yi-10cm, atshiyane ngesilinganiso se-40cm embundwini.
“Okunye okufunakalayo yikuthi kusetshenziswe inhlanyelo ehloliweyo ukuze athole isivuno esihle njalo lokhu kwenza isilimo sivikeleke emikhuhlaneni engabangela ukuthi isilimo singakhuli kuhle efana lepowdery mildew,” kulandisa uBanda.
“Umlimi kumele ahlale ethelela isilimo sakhe njalo ananzelele ukuthi nxa ethelela engatheli abantwana besilimo ngoba kucina kubola ngakho kumele aqinisekise ukuthi uthelela empandeni,” kuchasisa uNkszn Banda.
Uthe okunye okuqakathekileyo yikufaka ifethalayiza.
“Umlimi kumele aqinisekise ukuthi isilimo sakhe sithola ukudla okufaneleyo ngakho kumele ahlale efaka ifethalayiza.
Nxa esebenzisa umquba, asebenzise owenkukhu.
Nxa isilimo sesihluma kuqakathekile njalo ukuthi umlimi afake umquba ngemva kwamaviki amane,” kuphetha uNkszn Banda.
Online Reporter