admin
Siphathokuhle Ngulube
Salibonani bafundi.
Ngithemba liyazilandela kuhle izifundo ezisenza sibe ngabantu empilweni njalo sikwazi ukuhloniphana.
Akulanto eqakatheke njengokuhloniphana bafundi.
Umuntu ongahloniphiyo akuphileki laye esigabeni njalo ucina esezondwa ngumuntu wonke.
Ukungahloniphi kwesinye isikhathi kusukela ekutheni umuntu uyabe elokweyisa okuthile.
Umuntu oyeyiswayo isikhathi esinengi akahlonitshwa ngitsho uyadelelwa ukhangelelwa phansi nje.
Kwandile ke ukweyisana phakathi kwabafundi kusukela ezintweni nje ezitshiyeneyo ezingelancedo.
Abafundi bangeyisana bekhangele izinto ezilandelayo:
(a) izifundo.
(b) indlela yokugqoka.
(c) izimuli lapho abafundi abaphuma khona.
(d) ukudla okuthwalwa ngabafundi esikolo.
(e) abangane abafundi abahamba labo.
Lezi izinto ezibaliswe phezulu ngezinye zezinto bafundi elizikhangelayo leyisane kakhulukazi ngazo.
IZIFUNDO
Kwandile kakhulu bafundi ukuthi leyisane likhangele izifundo ezithile.
Abanye seyisana ngokuthi abanye bethu benza njani ezifundweni zabo.
Bakhona abanye abafundi abangaphiwanga ezifundweni okwenza bangaqhubi kuhle ezifundweni zabo ngoba nje bafundi kubalulekile ukuthi sibekwazi ukuthi siphiwe ngezindlela ezehlukeneyo.
Bakhona ke abanye bethu abasuka beyise kakhulu laba abafundi okwenza bacine bengasakhululeki ezifundweni bahlale nje benunubele.
Zikhona njalo ezinye inkulumo ezikhulunywa ngabanye bethu ngabafundi laba ezingamnandi.
Uzwe umuntu esithi, “Aaah! Kuyini engingakutshelwa nguSihle ngoba nje kakwazi khona ukubhala ibizo lakhe.”
Inkulumo ezinjengalezi azilunganga bafundi.
Zitshengisa ukweyisa okukhulu.
Asifundeni ukuhlonipha abanye bethu ngalokho abayikho khona.
Yinto embi ukweyisa omunye ezifundweni ngoba sonke siyafisa ukwenza kuhle kodwa siyabe singakuphiwanga.
INDLELA YOKUGQOKA
Ukugqoka kwethu kuya ngokuthi sizuza kangakanani ngekhaya. Ukuzuza kwezimuli phela kuyatshiyana bafundi.
Okunye kungabe kusenziwa yimisebenzi esetshenzwa ngabazali bethu.
Abanye abazali basebenza lapho abahola khona ngengwane kanti abanye njalo abazali bathola khonokho nje okuncane okwanela nje ukuthi kuthengwe ukudla izigqoko zingeneli.
Besesithola ke ukuthi abangane bethu abasuka kulezi izimuli abalazo izimpahla ezaneleyo.
Manje ke abanye bethu sisuka sibeyise kakhulu laba bafundi okwenza bacine bengasakhululeki ukuhlanganyela labanye.
Uzwe omunye esithi: “Ngizabe ngilomdlalo wami wokuzalwa.
Ngifuna ukunxusa abantu abakwazi ukugqoka hatshi oDudu abagqoka isigqoko esisodwa izinsuku zonke”.
Kambe inkulumo enje izamphatha njani uDudu bafundi.
Kuyikuthanda kwakhe yini ukuba lesigqoko esisodwa? Asinanzeleleni ke izinkulumo zethu nxa sikhuluma ngabanye bethu.
IZIMULI ESIPHUMA KIZO.
Kwesinye isikhathi bafundi siyeyisana kakhulu sikhangele izimuli lapho esiphuma khona.
Abanye abafundi baphuma ezimulini ezilenzuzo ephansi.
Lokhu kwenza ukuthi izimuli lezi ziswele mhlawumbe izinto eziqakathekileyo ezinjengezimota zohlobo oluphezulu, omakhalekhukhwini kanye lezinye izintwana ezitshengisa inzuzo.
Kujayelekile ke ukuthi seyisane sikhangela izimuli lezi esiphuma kuzo lenzuzo yazo.
Asifundeni ukuthi samukelane sinjalo.
Singeyisani ngenzuzo yezimuli.
Uzwe umuntu esithi: “ Angifuni kuthandana loNjabulo.
Uyangiphani ngoba nje ngakibo bangabayanga abanuka phu!” Inkulumo ezinjengalezi azamukeleki ngitsho emphakathini ngoba zenza laba abantwana abaphuma kulezi izimuli banunubale bacine njalo bengasenzi kuhle ezifundweni zabo.
Asihlanganeni ngeviki ezayo.
Online Reporter