Online Reporter
Ethel Ncube
IQEMBU labaculi abasakhulayo baseZimbabwe elaziwa ngokuthi Inkululeko Yabatsha School of Arts (Iyasa), lizakwethula umdlalo ohlangene lomculo, ogxile ekuguqukeni komumo womkhathi, okuyinkinga ethinta umhlaba wonke.
Umqondisi weqembu leli, uInnocent Dube uveze ukuba umdlalo wabo lo okhuluma ngokuguquka komumo womkhathi uzakwethula ezikolo ngenyanga kaNkwenkwezi.
Ekhuluma lentatheli mayelana ngomdlalo lo, uDube uchaze kabanzi ngokuqukethwe kuwo.
“Umdlalo wethu lo ulesihloko esithi Climate of Change: No Planet B. One Earth, One Chance, One Voice, okuveza ngokucacileyo ukuthi ukuguquka komumo womkhathi kudala ezinye izinkinga ezinkulu ezifana lobumpofu, ukungalingani, udlame lokuhlukumezeka kwabesifazane.
“Ngomculo, izinkondlo kanye lendaba eqinileyo, abaculi abatsha laba baseZimbabwe babuza imibuzo eqakathekileyo efana lokuthi: ikusasa lomhlaba liyangaphi? Intsha ingasiza yini ukuvimbela umonakalo omkhulu? Ngubani okufanele athwale umthwalo wokuvikela umhlaba? Kanti isikhathi sisasele yini sokuguqula izinto?
“Lo umdlalo womculo uhlose ukuvusa ingqondo zababukeli, ubuye uveze iqiniso elibuhlungu ngokonakala kwemvelo ngesikhathi esifanayo ukhuthaze abantu ukuthi bathathe amanyathelo okuvikela umhlaba,” kutsho uDube. Ubuye njalo waveza ukuba umdlalo lo uzakwethulwa lasemazweni afana laboGerman, abajwayele ukusebenzisana le Iyasa. “Iqembu le-Iyasa, elaziwa emhlabeni wonke ngomsebenzi walo wobuciko bentsha, lizahambisa njalo umdlalo lo ezikolo zaseGermany ngomnyaka ka-2026. Umsebenzi lo uhlanganisa umculo wesintu waseAfrica, umgido wesimanje ukuze kukhulunywe ngendaba yokuguquka komumo womkhathi.
“Ngalo umsebenzi, abafundi bazafunda ukucabanga ngokujulileyo ngendaba yokuvikelwa kwemvelo, ukuxhumana komhlaba wonke kanye lendima yentsha ekwakheni ikusasa elingcono.”
Ngalumdlalo, iqembu le-Iyasa lihlose ukuguqula indlela abantu abatsha abacabanga ngayo ngobuzwe bomhlaba kanye lomsebenzi wabo ekuvikeleni ikusasa lomhlaba wethu,” kuphetha uDube.
