admin
NguMsilisi Dube
INHLANGANISO yeAgritex ikhuthaza abalimi abasebekhulile abe-horticulture ukuthi balungise izivande ezibizwa ngokuthi yi-Low Cost Household Nutritional Gardens kumbe i-keyhole garden ukwenzela ukuthi banqobe udubo lwendlala emaphandleni.
Esivandeni lesi kubikwa abalimi bayenelisa ukuhlanyela imibhida, ihanyanisi, imiqwente, ama-beetroot lokunye okutshiyeneyo okungenela imuli.
UMnumzana Thabani Sibanda onguAgritex Officer eGweru uthe i-keyhole garden yisivande esenziwa embundwini owakhiwe ngamatshe lenhlabathi. Umbumdu lo kumele ube mude ulingane leqolo lalowo owakhayo, ukwenzela ukuthi umlimi alime emile engadingi ukukhothama. Umhlobo wesivande lo ulakho ukuthi usetshenziswe ngabalimi asebekhulile abangasenelisiyo ukukhothama okwesikhathi eside.
“Isivande lesi silusizo kakhulu kubalimi asebekhulile asebehlutshwa ngamaqolo ngoba umlimi uyenelisa ukulima imhlobo etshiyeneyo yembhida.
“Okudingakalayo nxa kusakhiwa i-keyhole ngumhlabathi ovundileyo, amatshe amakhulu, umlotha wenkuni, utshani obomileyo, amahlamvu, izibi ezithanyelwe egumeni, ingcekeza esuka ezihlahleni lezigodo zokubiya. Ukuze wakhe isivande lesi kumele ube lamabhara angu-20 omquba, angu-20 omlotha lamanye njalo angu-20 awenhlabathi,” kuchaza uMnu Sibanda.
Ingcitshi le ichasise ukuthi ku-keyhole garden kumele kugatshaniswe izigaba zenhlabathi, umquba, inhlabathi lomlotha, kuphindwe lokhu kuze kuyefika phezulu. Isigaba sokucina kumele sibe ngesenhlabathi lapho okuzahlanyelwa.
UMnu Sibanda uphethe ngokuchaza ukuthi isakhiwo se-keyhole garden siyagcina amanzi lomhlabathi uvundile njalo inhlabathi esetshenziswayo inika izilimo ukudla komquba okufaneleyo ukuze zikhule kuhle. Izilimo kumele zendlalelwe ngotshani obufakwa phezulu kwalapho okulinywe khona obuvikela inhlabathi kanye lomquba (mulch).
Online Reporter