admin
NguNdumiso Sibanda
INHLANGANISO esanda kusungulwa eyeZimbawe Youth Council’s Federation of Young Farmers isibike ukuthi abatsha balomlandu omkhulu kakhulu ekuvuseleleni ezokulima kuleli kanye lokubuyisela ezokulima ekubeni ngenye yezindlela eziletha imali yakwamanye amazwe kuleli.
Inhlanganiso le eyasungulwa mhlaka 7 Nhlolanja esigodlweni seHarare isiveze ukuthi ezokulima ziselakho ukuba yizo ezibambe umnotho wakuleli aluba intsha ingangena kulelibhizimusi, kuqhutshwe ukuchwayisiswa kanye lokuphawulwa kwenhlelo kusetshenziswa imitshina yakulezinsuku.
Isikhulumi senhlangaso yeZimbabwe Youth Council uMnumzana Innocent Katsande ubike ukuthi inhlanganiso le ifisa ukuthuthukisa abatsha ngokubanika ulwazi olujulileyo kanye lokukhanga ezinye ingatsha ukuthi zibambane labo ukuze kuvuselelwe ezokulima kuleli.
“Sibone kuqakathekile ukuthi abatsha elizweni lonke jikelele baqoqane ukuze benelise ukusebenzelana kumisebenzi yabo yokulima. Aluba bengaqoqana kuhle, ngilethemba lokuthi bangenelisa ukukhanga abanye abantu ukuthi bafake imali zabo kulelibhizimusi kanye lokuphana amasu angabathuthukisa emisebenzini yabo,” kutsho uMnu Katsande.
Inhlanganiso yeFederation of Young Farmers ibuye yacela uHulumende ukuthi acabangisise mayelana lokutholisa imali engange $50 miliyoni efunekayo ukuze kuvuselelwe ibhanga le-Agriculture Bank of Zimbabwe lona eselileminyaka lisehluleka ukunikeza usizo olwaneleyo kubalimi.
Ukubunjwa kwenhlanganiso le kuza ngesikhathi ugatsha lwezokulima lubhekane lenhlupho ezinengi, ezibalisela phakathi kwezinye ukuguquka komumo womkhathi, ukwehluleka kwamabhanga ukuboleka abalimi imali, ukudula kwempahla zokusebenzisa kanye lokusilela kolwazi olujulileyo mayelana lezokulima.
Online Reporter