admin
Ncekwenhle Ncube
ZIWELWE yinhlanhla yamaSwazi izikolo zesabelweni seMatabeleland North nanko phela zamukele isipho esivela kuSikhwicamfundo uJonathan Moyo ngesikhathi zilungiselela izifundo ze-O-level zeNombolo leSayensi eziqale ngoLwesithathu kuyonale iviki.
Izifundo zeNust Science Enrichment Programme (SEP) zizaqhutshelwa esikolo seTsholotsho High okwamaviki amathathu kusukela mhlaka 10 kuyonale inyanga njalo kulabafundi abangu-485.
Izifundo lezi zenziwa ngabafundi abasezikolo zeMatabeleland North abakhangelelwe ukuloba imihloliso yabo ye-O-level.
Intatheli kaMthunywa ibikelwe ukuthi umphathintambo wezefundo kuzinga eliphezulu uSikhwicamfundo Moyo usebenze gadalala nanko phela ukhuphe izigidi zamadola ukuze ontanga laba bazuze imfundo elohlonzi.
Ekhulumisana loMthunywa umphathisikolo weTsholotsho High uMnumzana Scelo Dube uveze ukuthi ujabule akazazi ngesibusiso abasinikezwe ngumhlonitshwa. Ubuye njalo wethula ukuthi umfundi munye ngamunye uzaphiwa i-calculator kanye lamabhuku okubala agoqela i-green book.
Kubikwa njalo indleko zababalisi ezigoqela imali zokuhambisa lokudla kukhokhelwe nguSikhwicamfundo. Kanti ngokufanayo abafundi bazaphiwa ukudla lakho okuthengwe nguSikhwicamfundo uMoyo.
Iphephandaba likazulu lizwe ukuthi ababalisi bamakolitshi agoqela iNust leHillside sebethe gwaqa eTsholotsho, okutsho ukuthi bazadonsa kanye kanye lababalisi bezikolo ukulolonga abafundi.
UDistrict Education Officer uMnumzana Kelvin Mathe uthe abafundi besabelweni lesi bayasilela ezifundweni zeNombolo leSayensi. Okuchaza ukuthi iNust SEP le izabathuthukisa ibatshiye sebekwelinye izinga elizabenza benelise ukufundela imisebenzi etshiyeneyo.
Online Reporter